Udhëtimi i datëlindjes në Turqi i një vajze britanike, përfundoi me një problem shumë serioz shëndetësor, që i la një pasojë të çuditshme.
Sipas mediave të huaja, Kathy Warren, nga Basingstoke, Hampshire, shkoi me pushime në Fethiye, Turqi, me miqtë, në shtator 2024 për të festuar ditëlindjen e saj të 28-të.
Ndërsa po shkonte në darkën e ditëlindjes, ajo ndjeu marramendje dhe nuk ishte në gjendje të ecte.
Ajo u dërgua me urgjencë në spital, ku mjekët e diagnostikuan me goditje në tru. Simptoma e saj e vetme ishte dhimbja e kokës, të cilën ajo ia atribuoi vapës.
Megjithatë, kjo ishte vetëm një pjesë e aventurës së saj, sepse kur u zgjua, gjërat u ndërlikuan edhe më shumë. Përveç faktit se për shkak të goditjes në tru, ana e saj e majtë ishte paralizuar, ajo papritmas foli me një theks tailandez.
E reja u diagnostikua me Sindromën e Theksit të Huaj, një gjendje e rrallë ku të folurit e një personi merr një theks që është i ndryshëm nga normalja dhe që njerëzit mund ta konsiderojnë si “të huaj”.
“Nuk mendoj se zëri im dhe e folura ime do të jetë ndonjëherë i njëjtë”, tha Kathy.
“Më parë kisha një theks britanik, por kur u zgjova theksi im ishte ndryshe. Nëna ime është nga Tailanda, kështu që ajo ka një theks tajlandez. Do të thoja se theksi që kam tani tingëllon si i saji, është tailandez, është i huaj”, tha ajo.
Mjekët besojnë se ndryshimi i papritur mund të jetë shkaktuar si nga dëmtimi i trurit ashtu edhe nga fakti që nëna e saj flet me theks tailandez.
Kathy qëndroi e shtruar në spital për një muaj në Turqi përpara se mjekët ta lejonin të fluturonte për në Mbretërinë e Bashkuar, ku filloi rehabilitimi i saj.
Ajo është në gjysmë të rrugës së shërimit dhe ka mësuar të ecë përsëri, ka përfunduar terapinë e të folurit, por thotë se theksi i saj nuk është rikthyer.
