Një oficer policie ka humbur jetën të shtunën pasdite gjatë një përplasjeje me armë zjarri në afërsi të Qendrës për Kontrollin dhe Parandalimin e Sëmundjeve (CDC) në Atlanta, SHBA. Sulmuesi u gjet i vdekur më pas në katin e dytë të një ndërtese pranë vendit të ngjarjes.
Sipas autoriteteve lokale, rreth orës 16:50 (ora lokale), policia u njoftua për një person të armatosur në zonën e Clifton Road, ku ndodhen kampuset e Universitetit Emory dhe të CDC-së. Zona u vendos menjëherë në izolim të plotë, ndërsa u aktivizua protokolli për “sulmues aktiv”.
Oficeri i vrarë u identifikua si David Rose, 33 vjeç, punonjës i Policisë së Qarkut DeKalb. Ai kishte hyrë në shërbim në shtator të vitit 2024 dhe kishte përfunduar trajnimin disa muaj më parë. Rose u qëllua gjatë ndërhyrjes dhe ndërroi jetë më pas në Spitalin e Universitetit Emory.
“Një ditë e errët për qarkun tonë”, tha shefi i përkohshëm i policisë, Greg Padrick, duke shprehur ngushëllime për familjen e oficerit, e cila përfshin gruan, dy fëmijë të vegjël dhe një fëmijë në pritje.
Trupi i pajetë i sulmuesit u gjet brenda një ndërtese ku ndodhej një barnatore (CVS). Hetimet janë në zhvillim e sipër dhe ende nuk është konfirmuar nëse ai u vetëvra apo u qëllua nga policia gjatë shkëmbimit të zjarrit.
Autoritetet raportuan se katër ndërtesa të kampusit të CDC-së u goditën nga plumbat, por fatmirësisht nuk pati të lënduar të tjerë. Në një prej godinave ndodheshin edhe 92 fëmijë në çerdhe, të cilët janë në gjendje të mirë shëndetësore.
Active shooter incident at Emory University’s Atlanta campus ends with suspect killed in officer-involved shooting at a CVS. Gunfire struck nearby buildings, including CDC HQ. Campus was under shelter-in-place, classes suspended as police secured the area. #EmoryUniversity… pic.twitter.com/RbOsGZlIFE
— Mayin (@MayinPuri) August 8, 2025
