Dy avionë luftarakë amerikanë u përplasën në ajër gjatë një shfaqjeje ajrore në SHBA, duke shkaktuar zjarr dhe ndërprerjen e menjëhershme të aktivitetit. Incidenti ndodhi të dielën, gjatë ditës së dytë dhe të fundit të shfaqjes “Gunfighter Skies”, pranë bazës ajrore Mountain Home në shtetin Idaho.
Sipas një zëdhënësi të Marinës Amerikane, avionët EA-18G po kryenin një demonstrim ajror në momentin e përplasjes. Të katër anëtarët e ekuipazhit arritën të hidheshin me parashutë në mënyrë të sigurt, ndërsa autoritetet thanë se ata ndodhen në gjendje të stabilizuar. Ende nuk është bërë e ditur nëse kanë pësuar lëndime.
Pas përplasjes shpërtheu zjarr dhe baza ushtarake u mbyll përkohësisht, ndërsa pjesa e mbetur e shfaqjes ajrore u anulua. Autoritetet kanë nisur hetimet për të përcaktuar shkaqet e incidentit.
“Njerëzit e përfshirë në incident janë në gjendje të stabilizuar”, thuhet në deklaratën e publikuar nga Mountain Home Air Force Base Gunfighters në rrjetet sociale.
Zëdhënësi i Marinës tha se ekuipazhi po i nënshtrohej kontrolleve mjekësore. Avionët EA-18G Growler i përkisnin një skuadriljeje të specializuar për sulme elektronike nga shteti i Uashingtonit. Sipas Marinës Amerikane, secili prej këtyre avionëve kushton rreth 67 milionë dollarë.
Kim Sykes nga organizata “Silver Wings of Idaho”, e cila ndihmoi në organizimin e aktivitetit, tha për median lokale CBS se askush në bazën ushtarake nuk u lëndua.
Shfaqja ajrore “Gunfighter Skies” ishte organizuar për herë të fundit në vitin 2018, kur një pilot humbi jetën në një aksident.
