Grushte, shkelma, madje edhe bishta çadrash. Këto janë pamjet nga një sherr që ka shpërthyer midis turistëve britanikë dhe tregtarëve turq në një resort në Alanya.
Sipas mediave lokale, përleshja filloi jashtë një butiku në rrugën Ataturk kur një grup prej gjashtë britanikësh filluan të ziheshin me një shitës që ishte ulur në hyrje të biznesit të tij.
Videoja tregon pronarin e lokalit duke rënë përtokë pasi është goditur me grushte dhe shqelma, ndërsa tregtarë të tjerë vrapojnë për ta ndihmuar.
Pjesëmarrësit në sherr filluan të qëllonin me shkopinj dhe objekte të ndryshme ndaj njëri-tjetrit, duke krijuar kaos në zonën përreth.
Mediat turke raportuan disa të plagosur dhe autoritetet në qytetin e Alanyas vendosën një bllokim tre-ditor të biznesit ku filloi sherri.
