Çdo destinacion udhëtimi ka bukurinë e vet. Ushqimi, udhëtimet, historia, atraksionet janë disa nga elementët që tërheqin turistët në mbarë botën. Megjithatë, ndoshta elementi më i rëndësishëm për të gjithë është se sa i sigurt është destinacioni që i intereson.
Ekziston një qytet që renditet si më i sigurti në Evropë, sipas një analize nga agjencia ndërkombëtare e udhëtimit Riviera Travel.
Hulumtimi mori në konsideratë nivelet aktuale të krimit në përpjesëtim me rritjen e shkallës së krimit në mbarë botën gjatë pesë viteve të fundit. Më pas, u përpilua një rezultat i përgjithshëm sigurie, duke zbuluar se sa i sigurt është secili qytet.
Dubrovniku i njohur dhe shumë turistik në Kroaci është në krye të listës me një rezultat të përgjithshëm sigurie prej 44.14 nga modeli i vlerësimit Riviera Travel. Përveçse është një vend i sigurt, Dubrovniku tërheq shumë turistë për shkak të arkitekturës së tij mesjetare dhe është një xhevahir i Trashëgimisë Botërore të UNESCO-s.
Qyteti njihet si “Perla e Adriatikut” dhe ka një qytet të vjetër piktoresk që ia vlen të eksplorohet. Në fakt, shumë skena nga “Game of Thrones” janë xhiruar atje për shkak të karakterit mesjetar të qytetit të vjetër. Dubrovniku mori një vlerësim prej 8.76 për nivelin e krimit, që tregon se është “shumë i ulët”, dhe 35.38 për rritjen e krimit gjatë pesë viteve të fundit, që është gjithashtu “i ulët”.
Në vendin e dytë në listën e Riviera Travel është Talini, kryeqyteti i Estonisë, me një rezultat të përgjithshëm sigurie prej 55.81. Ashtu si Dubrovniku, Talini është gjithashtu një Vend i Trashëgimisë Botërore të UNESCO-s dhe një qytet me karakter mesjetar.
Kryeqyteti polak, Varshava, renditet i treti me një rezultat prej 60.19. Destinacioni popullor ka parë një rritje “të moderuar” të krimit gjatë pesë viteve të fundit, por pamja e përgjithshme vazhdon të tregojë një shkallë krimi “shumë të ulët”. Shumë turistë e vizitojnë për të përjetuar historinë e tij të pasur dhe kuzhinën unike polake.
Praga renditet e katërta me një rezultat prej 60.88, me një rritje “të moderuar” të krimit gjatë pesë viteve të fundit dhe një rezultat të përgjithshëm “shumë të ulët” të krimit. Kryeqyteti i Republikës Çeke dhe qyteti më i madh i vendit, Praga është një destinacion popullor evropian për mijëra turistë çdo vit, të tërhequr nga katedralet e saj gotike dhe peizazhi i mbushur me kulla.
Në vendin e pestë, Krakovi u rendit me 64.31 pikë dhe, sipas Riviera Travel, ka një shkallë krimi “të ulët” prej 20.7 dhe një rritje “të moderuar” të krimit gjatë pesë viteve të fundit prej 43.61. Krakovi krenohet me tregun më të madh mesjetar të Evropës , si dhe me një Qytet të Vjetër të famshëm dhe është një tjetër Vend i Trashëgimisë Botërore të UNESCO-s.
Ndërkohë, Amsterdami u rendit i gjashti me një rezultat prej 71.09, i ndjekur nga Mynihu i Gjermanisë me 73.74 dhe kryeqyteti i Islandës, Reykjavik.
Zyrihu zuri vendin e nëntë, i ndjekur nga kryeqyteti hungarez Budapesti në vendin e dhjetë.
