Pas reagimit të ministrit në detyrë të Financave, Hekuran Murati, ndaj kryetarit të LDK-së Lumir Abdixhiku, ka reaguar edhe deputetja e kësaj partie, Hykmete Bajrami, me një qëndrim të ashpër në rrjetin social Facebook, duke i përmendur Muratit çështje të rënda që lidhen me sektorin e energjisë dhe keqqeverisjen sipas saj.
Në reagimin e saj, Bajrami i drejtohet Muratit me tone të forta, duke e akuzuar për heshtje përballë skandaleve të mëdha në sektorin energjetik:
“Ti deputet që je në shkelje të vazhdueshme të Nenit 72 të Kushtetutës mos u merr me shtet-formuesit, se s’është kjo punë për ty.”
Ajo e ka ftuar ministrin që t’i japë përgjigje publikut për një sërë çështjesh të ndjeshme, si përfitimet e kompanive të dyshimta nga importi i energjisë, tenderët milionësh të KEK-ut dhe përjashtimin e bizneseve nga furnizimi universal.
Reagimi i plotë:
Ti deputet që je në shkelje të vazhdushme të Nenit 72 të Kushtetutës mos u merr me shtet-formuesit, se s’është kjo punë për ty.
Tregona më mirë për lulëzimin e mafisë energjetike gjatë qeverisjes suaj.
Tregona se si një kompani (NOA) që tregton energji në Kosovë për tri vjet u bë kompania e tretë për nga qarkullimi në vitin 2024 -160 milionë euro qarkullim (2024).
Tregona pse jemi bërë kaq të varur nga importi i shtrenjtë i energjisë.
Tregona pse KEK-u vonohet me vite për të riparuar blloqet dhe s’ mban përgjegjësi askush?
Tregona qysh KEK-u ka shpallë tender me negociata 137 milionësh për remontin e A3 pa asnjë studim të fizibilitetit.
Tregona qysh kompanitë si NOA dhe EFT e Vuk Hamoviqit kontrollojnë tregun e energjisë dhe fitojnë miliona euro, ndërsa qytetarëve u rritet çmimi i energjisë çdo vit e 1300 biznese vendore përjashtohen nga shërbimi i furnizimit universal.
Tregona për përformancën e njerëzve tuaj në ZRRE dhe në KOSTT?
Tregona qysh ka mundësi që sot, në këtë ditë gjysmën e energjisë që shpenzojmë jemi duke e importu?
Tregona kush po fiton se qytetarët dhe bizneset po paguajnë për këto fitime.
Kur të përgjigjesh për këto, atëherë ndoshta mund të flasësh edhe për të tjerët.
