Një pajisje e re po provon t’i përgjigjet një problemi që po prek gjithnjë e më shumë njerëz, si të dalësh nga shtëpia pa qenë vazhdimisht i lidhur me smartphone-in, por pa humbur funksionet që të duhen realisht.
Quhet Meadow dhe, sipas një prove të publikuar nga TechCrunch më 25 shtator, pajisja funksionon si një telefon minimalist që mund të përdoret për gjërat bazë të jetës së përditshme, pa e kthyer përdoruesin te rrjetet sociale dhe shfletimi i pafund në internet.
Meadow ka një ekran të vogël katror dhe funksionon me Android, çka i mundëson të mbështesë aplikacione si Maps, Uber, Apple Music, Spotify dhe Strava, përveç thirrjeve, mesazheve, kamerës, shënimeve, regjistrimeve zanore dhe skanimit të biletave.
TechCrunch e testoi pajisjen në një situatë reale: gazetarja porositi Uber, dëgjoi Apple Music gjatë rrugës dhe hyri në një koncert duke skanuar biletën direkt nga Meadow, pa pasur nevojë ta përdorte iPhone-in.
Ideja nuk është që Meadow ta zëvendësojë plotësisht smartphone-in.
Themeluesi i kompanisë, Shreyas Narlanka, thotë se pajisja është menduar si një shoqërues për momentet kur përdoruesi dëshiron të dalë jashtë, të shkëputet nga rrjetet sociale dhe të mos e kalojë kohën duke parë ekranin.
Megjithatë, ka edhe kufizime.
Përdoruesi nuk mund ta përdorë numrin e tij të zakonshëm të telefonit, por duhet të ketë një plan të veçantë për Meadow. Po ashtu, fotografitë e bëra me pajisjen nuk shihen menjëherë në të, por vetëm pasi përdoruesi të kthehet te telefoni kryesor.
Pajisja tashmë ka nisur t’u dërgohet klientëve që e kishin porositur paraprakisht.
Në një kohë kur kompanitë e mëdha po përpiqen të shtojnë gjithnjë e më shumë funksione në smartphone, Meadow po provon të bëjë të kundërtën: të heqë sa më shumë gjëra prej tij.
