Një mbrëmje e zakonshme për të marrë një picë u kthye në një moment që u ndryshoi jetën Dennis dhe Annette Huber, një çift pensionistësh nga Missouri, SHBA.
Më 12 maj, teksa prisnin porosinë e tyre në një restorant, çifti kuptoi se nuk kishte para të vogla për të lënë bakshish. Dennis vendosi të shkonte në një dyqan ushqimor për të thyer një kartëmonedhë, por në vend të kësaj, bleu një biletë gërvishtëse prej 20 dollarësh.
Në mënyrë të pabesueshme, bileta rezultoi fituese e çmimit prej 1 milion dollarësh. “Mendoj se kjo vlen një milion,” i tha ai gruas kur u kthye, ende në shok. Fitorja u konfirmua zyrtarisht nga Loteria e Missouri më 15 maj, transmeton A2CNN.
Dennis dhe Annette, të martuar prej më shumë se 40 vitesh, janë njohur për jetën e tyre modeste. “Nuk jemi njerëz që kërkojmë luks, është thjesht e pabesueshme,” u shprehën ata për mediat vendase. Ata nuk planifikojnë ndryshime të mëdha në jetën e tyre, por shpresojnë të blejnë një kamper për të udhëtuar dhe për të shijuar vitet e pensionit.
Sipas Loterisë së Missouri, shanset për të fituar këtë çmim ishin rreth 1 në 2.4 milionë – një dëshmi se edhe një vendim i rastësishëm mund të sjellë fat të jashtëzakonshëm.
