Kryeministri izraelit, Benjamin Netanyahu, deklaroi se Izraeli synon të marrë kontrollin e plotë të Rripit të Gazës, teksa ushtria izraelite ka intensifikuar ofensivën në këtë territor të shkatërruar nga lufta. Sulmet ajrore kanë goditur të gjithë Gazën, ndërsa është dhënë urdhër për evakuimin e një prej qyteteve më të mëdha të saj.
Të hënën, ushtria izraelite urdhëroi të gjithë banorët e qytetit jugor Khan Younis – qyteti i dytë më i madh përpara luftës – të largoheshin drejt perëndimit, në zonën e shpallur “humanitare” të al-Mawasit, përpara një “sulmi të paparë” që pritet mbi qytetin.
Sipas Netanyahu-t, qëllimi i fushatës së zgjeruar është marrja e kontrollit të plotë të territorit të Gazës dhe “shkatërrimi i plotë i Hamasit”. Izraeli ka shtuar edhe dy divizione të reja këmbësorie dhe të blinduara në Gaza, duke e çuar numrin total në pesë divizione.
Media lokale raportuan se një njësi e fshehtë e forcave speciale izraelite, e veshur si refugjatë civilë, kishte depërtuar në Khan Younis për të shënjestruar një militant të nivelit të lartë. Forcat e Mbrojtjes së Izraelit konfirmuan njohurinë për incidentin, por thanë se “vlerësimi i situatës mbetet i pandryshuar”.
Në paralel, Netanyahu njoftoi rikthimin e kufizuar të ndihmës humanitare në enklavë – një veprim që ai e konsideroi të nevojshëm për ruajtjen e legjitimitetit ndërkombëtar. Qeveria izraelite miratoi të dielën në mbrëmje rifillimin e dërgesave me ushqime, pas një rrethimi dy mujor.
Për herë të parë, Netanyahu pranoi publikisht se popullata e Gazës ndodhet në prag të urisë:
“Po i afrohemi vijës së kuqe. Nëse humbasim kontrollin, gjithçka mund të rrënohet”, tha ai të hënën, duke theksuar se presioni ndërkombëtar, veçanërisht nga SHBA, e detyroi qeverinë e tij të lehtësojë bllokadën.
Ai shtoi se “miqtë tanë në mbarë botën dhe në Kongresin amerikan na kanë paralajmëruar: ‘Nuk mund të mbështesim fotografi të urisë masive’”.
Pavarësisht tensioneve, administrata Trump – një mbështetëse e fortë e qëllimeve të luftës izraelite – ka paralajmëruar për një situatë humanitare kritike. Emisari amerikan, Steve Witkoff, deklaroi për ABC se SHBA nuk do të lejojë që një krizë e tillë të ndodhë gjatë mandatit të Presidentit Trump.
Një burim i njohur me situatën humanitare në Gaza tha se të dielën në mbrëmje, OKB-së dhe agjencive të saj iu kërkua të përgatiteshin për hyrjen e një sasie të konsiderueshme kamionësh me ndihma, në kuadër të modelit të mbikëqyrur nga OKB-ja që është në fuqi që nga tetori 2023.
Zyra e OKB-së për Koordinimin e Çështjeve Humanitare konfirmoi se “autoritetet izraelite kanë kërkuar rifillimin e shpërndarjes së kufizuar të ndihmës” dhe janë në bisedime për mënyrën e zbatimit të saj në terren.
Netanyahu shmangu një votim në kabinetin e sigurisë për këtë vendim, për shkak të frikës se do të refuzohej, duke nxjerrë në pah përçarjet brenda qeverisë. Zyrtarë izraelitë pretendojnë se ndihmat humanitare përvetësohen nga Hamasi.
Bezalel Smotrich, ministri ultranacionalist i Financave, i cili më parë kishte kërcënuar me dorëheqje nëse rifilloheshin ndihmat, u shpreh se e mbështet kryeministrin, por këmbënguli se “asnjë ndihmë nuk duhet të përfundojë në duart e Hamasit, pikë”.
Netanyahu tha gjithashtu se një skemë e propozuar nga administrata Trump – sipas së cilës një fondacion me bazë në Zvicër, i quajtur “Fondacioni Humanitar i Gazës”, do të shpërndante ndihma nën mbikëqyrjen e ushtrisë izraelite dhe kontraktorëve privatë – është ende në fazën e ndërtimit dhe “do të kërkojë kohë”.
Ofensiva e zgjeruar vjen në një kohë kur negociatorët amerikanë, egjiptianë dhe katarë në Doha po përpiqen të ndërmjetësojnë një armëpushim të ri mes Izraelit dhe Hamasit. Netanyahu ka deklaruar se do të negociojë vetëm “nën zjarr”, me synim lirimin e 58 pengjeve të mbetura të kapura nga Hamasi më 7 tetor 2023, prej të cilëve rreth 20 besohet se janë ende gjallë.
Ai është i vendosur të vazhdojë luftën deri në “fitoren e plotë”, përfshirë çarmatimin e Hamasit dhe rrëzimin e udhëheqjes së tij.
