Prokuroria Speciale e Kosovës, ka njoftuar se e kanë ndaluar për 48 orë prokurorin e Prokurorisë në Prizren, Beqë Shala.
Ai dyshohet për veprën penale “marrje ryshfeti”.
Sipas Prokurorisë, Drejtoria për Hetimin e Krimit të Organizuar dhe Krimeve të Rënda në Policinë e Kosovës, në bazë të urdhrit të lëshuar nga Gjykata Themelore në Prishtinë, kanë kryer bastisje në zyrën e punës dhe në vendbanimin e të dyshuarit.
“Gjatë bastisjes janë sekuestruar prova materiale që do të shërbejnë gjatë procedurës hetimore penale. Prokuroria Speciale, brenda afatit ligjor të përcaktuar në Kodin e Procedurës Penale do të parashtrojë kërkesë për caktimin e masës së paraburgimit ndaj të dyshuarit. Prokuroria Speciale, në bashkëpunim me Policinë e Kosovës, rithekson përkushtimin në luftën kundër korrupsionit dhe në sjelljen para drejtësisë të të gjithë personave të dyshuar për kryerjen e veprave penale korruptive”, thuhet në njoftimin e Prokurorisë.
Bazuar në një audioincizim që ka siguruar “Betimi për Drejtësi”, Shala ka marrë ryshfet 350 euro nga avokatja e një të dyshuari për të mos ia caktuar të njëjtit masën e paraburgimit.
