Dy aeroplanë ushtarakë rusë kanë hyrë në hapësirën ajrore të Lituanisë të enjten për rreth 18 sekonda, ka bërë të ditur ushtria lituaneze. Incidenti ka ndodhur rreth orës 16:00, kur një avion luftarak Su-30 dhe një avion cisternë Il-78 kaluan kufirin nga enklava ruse e Kaliningradit, e cila kufizohet me Lituaninë dhe Poloninë.
Sipas autoriteteve lituaneze, avionët besohet se ishin në një mision trajnimi për furnizim me karburant në ajër kur depërtuan në territorin e vendit anëtar të NATO-s.
Presidenti i Lituanisë, Gitanas Nauseda, reagoi ashpër ndaj incidentit, duke e cilësuar atë si “shkelje flagrante të së drejtës ndërkombëtare dhe integritetit territorial”.
“E dënoj fuqimisht shkeljen e hapësirës ajrore lituaneze kohët e fundit nga një avion luftarak dhe një aeroplan transporti i Federatës Ruse nga rajoni i Kaliningradit. Ne duhet të reagojmë ndaj kësaj”, tha Nauseda në një video të publikuar në platformën X, sipas raportimeve të “Euronews”.
Në fund të shtatorit, NATO-ja kishte paralajmëruar Moskën se do të përdorte “të gjitha mjetet e nevojshme për të mbrojtur hapësirën e saj ajrore”, pasi dronë rusë u rrëzuan mbi Poloni dhe Estonia raportoi ndërhyrje nga avionë luftarakë rusë.
