Agjencia amerikane NASA ka publikuar pamje nga testet e para të aeroplanit të saj eksperimental X-59, i cili tashmë ka filluar të lëvizë me fuqinë e vet në pistën e Forcave Ajrore të SHBA-së në Palmdale, Kaliforni.
Piloti i testimit të NASA-s, Nils Larson, së bashku me ekipin e përbashkët të NASA-s dhe kompanisë Lockheed Martin, kanë përfunduar me sukses fazën e parë të provës së ashtuquajtur “taksim” – që nënkupton lëvizjen e kontrolluar të aeroplanit në pistë me shpejtësi të ulët.
Këto janë testet e fundit para fluturimit të parë të aeroplanit, që pritet të ndodhë në javët në vijim. Sipas planit, pas fazës aktuale, X-59 do të kalojë në testime me shpejtësi më të lartë, për të arritur pikën ku pritet ngritja e tij nga toka.
Gjatë testimeve, inxhinierët vëzhguan funksionimin e sistemeve kritike si frenimi dhe drejtimi, për të siguruar kontroll dhe stabilitet maksimal të mjetit ajror në të gjitha kushtet.
Këto faza testimi janë vendimtare për të garantuar që aeroplani të jetë gati për fluturimin e parë, dhe për të konfirmuar sigurinë dhe funksionimin e të gjitha komponentëve.
