Deputeti i LDK-së, Besian Mustafa, ka reaguar pas iniciativës për zgjedhjen e drejtpërdrejtë të Presidentit, duke kritikuar Vetëvendosje për, siç ka thënë ai, ndryshimin e qëndrimeve ndaj Gjykatës Kushtetuese.
Përmes një postimi në rrjetet sociale, Mustafa ka ironizuar qëndrimin e VV-së ndaj Gjykatës Kushtetuese.
“Sa shumë po e dojnë VV-ja sonte Gjykatën Kushtetuese”, ka shkruar ai, duke e shoqëruar reagimin me një emoji qeshjeje.
Deputeti i LDK-së ka thënë se partia e tij mbështet zgjedhjen e drejtpërdrejtë të Presidentit nga qytetarët, duke theksuar se këtë qëndrim e ka pasur edhe më herët.
“Po, pajtohem, le të zgjidhet Presidenti direkt nga populli, qysh kemi thënë edhe në 2010-11 kur është diskutuar kjo çështje”, ka deklaruar Mustafa.
Megjithatë, ai ka ngritur pyetjen pse kjo temë nuk është hapur më herët nga partia në pushtet.
“Por ku ishte VV qe 5 vjet pushtet? Pse KURRË nuk e hapën këtë diskutim deri sonte?”, ka shkruar Mustafa në reagimin e tij.
