Ministri i Mbrojtjes i Izraelit, Israel Katz, ka kërcënuar të shkatërrojë qytetin e Gazës, pasi kryeministri Benjamin Netanyahu tha se ushtria e vendit do të zgjerojë ofensivën e saj atje.
Në një postim në rrjetin social ‘X’, Katz tha se Izraeli dje miratoi planet e IDF-së për të mposhtur Hamasin në Gaza “me zjarr intensiv, evakuim të banorëve dhe manovra”.
“Së shpejti, portat e ferrit do të hapen mbi kokat e vrasësve dhe përdhunuesve të Hamasit në Gaza derisa ata të bien dakord me kushtet e Izraelit për t’i dhënë fund luftës, kryesisht lirimin e të gjithë pengjeve dhe çarmatimin e tyre”, shkruan Katz.
“Nëse nuk bien dakord, Gaza, kryeqyteti i Hamasit, do të bëhet Rafah dhe Beit Hanoun. Pikërisht siç premtova, kështu do të jetë”, vijoi ai më tej.
Siç kemi raportuar, IDF ka filluar të telefonojë mjekët dhe organizatat ndërkombëtare në Gazën veriore për t’i inkurajuar ata të evakuohen në jug përpara operacionit të zgjeruar në Qytetin e Gazës.
Shumë nga aleatët më të ngushtë të Izraelit i kanë kërkuar qeverisë të rishqyrtojë vendimin.
Disa izraelitë kanë frikë se kjo mund të dënojë rreth 20 pengjet e mbetura të marra nga Hamasi.
Palestinezët po ikin nga disa pjesë të qytetit të Gazës pasi ushtria izraelite filloi fazat e para të një ofensive tokësore të planifikuar, thonë zyrtarët në qytet.
Trupat izraelite kanë krijuar një pikëmbështetje në periferi të qytetit ku jetojnë më shumë se një milion palestinezë pas ditësh bombardimesh dhe zjarri artilerie intensiv.
Kjo e ka shtyrë Sekretarin e Përgjithshëm të OKB-së, António Guterres, të ripërtërijë thirrjet për një armëpushim të menjëhershëm “për të shmangur vdekjen dhe shkatërrimin” që një sulm do të “shkaktonte në mënyrë të pashmangshme”.
Izraeli dëshiron të sinjalizojë se po ecën përpara me planin e tij për të pushtuar të gjithë qytetin e Gazës, pavarësisht kritikave ndërkombëtare.
Qindra palestinezë në lagjet Zeitoun dhe Sabra të qytetit të Gazës janë larguar drejt pjesës veriperëndimore të qytetit.Banorët e qytetit të Gazës përshkruan bombardime të pandërprera gjatë natës deri këtë të enjte.
Kryeministri Benjamin Netanyahu ka thënë se po “shkurton afatet kohore” për marrjen e asaj që ai e përshkroi si “fortesat e fundit të terroristëve” në Gaza.
Në një deklaratë, Hamasi akuzoi udhëheqësin izraelit për vazhdimin e një “lufte brutale kundër civilëve të pafajshëm në Qytetin e Gazës” dhe kritikoi atë që e quajti “shpërfillje” e tij për një propozim të ri për armëpushim nga ndërmjetësit rajonalë. Izraeli ende nuk i është përgjigjur zyrtarisht planit.
