Organizata e Veteranëve të Luftës së Ushtrisë Çlirimtare të Kosovës (OVL-UÇK) ka njoftuar se protesta e radhës kundër padrejtësive ndaj ish-pjesëtarëve të UÇK-së është zhvilluar sot në Strasburg të Francës, para Asamblesë së Këshillit të Evropës.
Sipas OVL-UÇK-së, gjatë protestës u dorëzuan 285 letra, të adresuara individualisht për secilin anëtar të Asamblesë Parlamentare të Këshillit të Evropës.
Këto letra përmbajnë shqetësimet e organizatës lidhur me proceset gjyqësore në Dhomat e Specializuara në Hagë dhe kërkojnë vëmendje ndërkombëtare për atë që ata e cilësojnë si trajtim të padrejtë ndaj ish-luftëtarëve të lirisë.
OVL-UÇK theksoi se protesta në Strasburg është vazhdimësi e angazhimit të tyre për të kërkuar drejtësi dhe respektim të të drejtave të ish-pjesëtarëve të UÇK-së.
Organizata bëri të ditur se letra e dorëzuar për 285 anëtarët e Asamblesë përmban mesazhin e tyre të qartë për domosdoshmërinë e një procesi të drejtë dhe të paanshëm për të gjithë të akuzuarit.
