Momenti i arrestimit të ish-kryeministrit të Kosovës, Ramush Haradinaj, ka shënjuar jetën e bashkëshortes së tij, Anita Muçajt, që kujton mes emocionesh periudhën e vështirë.
Në një intervistë Anita kujtoi se e mësoi lajmin për dorëheqjen e Haradinajt nga drejtimi i qeverisë, përmes televizionit.
“Duke u marrë me djalin, nuk i kisha ndjekur lajmet dhe e kisha lënë me një shoqe për të dalë për drekë. Ndërkohë, shoh në televizor që Ramushi dha dorëheqjen. Nuk e besova, mora producentin e lajmeve ku punoja, i thashë a jam unë sonte në lajme. Më tha ‘në orar po, por nuk ka nevojë të vish’. Aty e kuptova që ishte e vërtetë”.
Rruga drejt Hagës dhe dorëzimit i Haradinajt te autoritetet ishte një traumë e madhe për Anitën.
“U nisëm më pas drejt Hagës. Kur shkuam atje, nga një përcjellje me makina të kryeministrit, futet një shtet të të vërë prangat, është e dhimbshme. Aty nisa të qaj”.
Kjo periudhë, kujton ajo, ishte edhe më e vështirë pasi mësoi se e ëma vuante nga kanceri dhe duhet të bënte një ndërhyrje të ndërlikuar.
“Po atë ditë, kisha përcjellë edhe mamin në spital, sepse ishte e sëmurë me kancer dhe të nesërmen do hynte në operacion”.
