Analisti politik Lulzim Peci ka reaguar ndaj deklaratës së ministres së Qeverisë së Serbisë, Snezhana Paunoviq, duke vlerësuar se ajo dëshmon se, megjithëse Sllobodan Millosheviqi e humbi luftën në Kosovë, ideologjia e tij vazhdon të mbizotërojë në establishmentin shtetëror serb.
Sipas Pecit, kjo tregon gjithashtu se politika e Bashkimit Evropian për afrimin e Serbisë ka probleme serioze dhe përbën një dështim strategjik në aspektin e vlerave demokratike dhe njerëzore për integrimin e Serbisë në BE.
Ai shprehu pritjen që Shtetet e Bashkuara të Amerikës ta trajtojnë këtë deklaratë në mënyrën që, sipas tij, e meriton Qeveria e Serbisë, duke kujtuar se NATO bombardoi Beogradin në vitin 1999 për shkak të politikave të regjimit të atëhershëm serb.
Në fund, Peci shkroi se “në garën e budallakisë, fosilet e nazizmit të Serbisë nuk kanë të sosur”.
Postimi:
Deklarata e Ministres etnocide Paunoviq te Qeverise se Serbise rideshmon nje gje dhe ate qe edhepse Millosheviqi e ka humbur luften ne Kosove, ideologjia e tij vazhdon te jete triumfuese ne establishmentin shteteror te Serbise.
Kjo deshmon poashtu se politika e perafrimit e Brukselit per Beogradin ka probleme serioze, dhe ajo shpefaqe nje deshtim strategjik ne aspektin ideologjik dhe te vlerave njerezore per integrimin e Serbise ne BE.
Shpresoj, se SHBA-ja do ta trajtoj kete deklarate ashtu edhe si e meriton qeveria serbe. Fundja, per shkak te kesaj politike, ajo edhe e ka bombarduar Beogradin ne vitin 1999.
Nje gje duhet pranuar, dhe ate qe ne garen e budallakise, fosilet e nacizmit te Serbise te sosin!
