Kryetarja e Kuvendit të Kosovës, Albulena Haxhiu u ka bërë thirrje subjekteve politike opozitare që të dalin me një propozim të një emri për president.
Të enjten, pas mbledhjes së Kryesisë së Kuvendit, ajo fajësoi dy partitë opozitare, PDK dhe LDK, për mungesë reflektimi për zgjidhjen e çështjes së presidentit.
“Unë sot e kësaj dite nuk e di se kush është kandidati për president i LDK-së apo PDK-së. Unë të paktën, deri tani, nuk kam dëgjuar ende që këto subjekte politike kanë ndonjë emër për president. Le ta bëjnë këtë, le t’i propozojnë emrat për president dhe pastaj i trajtojmë ato e flasim dhe vendosim për të”, tha ajo.
“Në mungesë të një emri, mendoj që po e dëmtojnë Republikën e Kosovës, por nëse kështu kanë vendosur atëherë ne s’kemi çfarë ju bëjmë”, u shpreh Haxhiu.
Haxhiu tha se nuk ka parë reflektim nga partitë opozitare për të arritur një marrëveshje për çështjen e presidentit.
Sipas saj, kurdo që partitë politike arrijnë një dakordim për këtë çështje, ajo është e gatshme të thërrasë seancë të jashtëzakonshme parlamentare.
