Në një fjalim sfidues para Asamblesë së Përgjithshme të OKB-së, ministri i Jashtëm rus Sergei Lavrov, ka kërcënuar hapur NATO-n dhe BE.
Ai hodhi poshtë akuzat se Moska po planifikon të sulmojë vendet e NATO-s apo të Bashkimit Europian. Lavrov theksoi se Rusia nuk ka dhe nuk ka pasur kurrë qëllime të tilla, por shtoi me ton të ashpër: “Por çdo agresion ndaj vendit tim do të marrë një përgjigje të vendosur. Le të mos ketë asnjë dyshim për këtë në NATO dhe BE”.
Pas këtij paralajmërimi, Lavrov u ndal edhe tek konflikti në Ukrainë, ku përsëriti se Rusia mbetet e hapur për negociata. “Siç ka thënë shpesh Presidenti Vladimir Putin, Rusia është dhe mbetet e gatshme për bisedime mbi eliminimin e shkaqeve rrënjësore të konfliktit. Siguria jonë dhe të drejtat e rusëve dhe rusishtfolësve në territoret nën kontrollin e Kievit duhet të garantohen plotësisht. Vetëm mbi këtë bazë mund të diskutojmë garanci sigurie edhe për Ukrainën”, deklaroi ai.
Në pjesën e parë të fjalës, Lavrov u përqendrua tek Lindja e Mesme. Ai dënoi sulmin e Hamasit të 7 tetorit ndaj Izraelit, por shtoi se “nuk ka asnjë justifikim për masakrat brutale ndaj palestinezëve” që pasuan. Më tej, ai kritikoi planet e Izraelit për aneksimin e Bregut Perëndimor dhe i quajti të vonuara përpjekjet e disa shteteve për të njohur Palestinën në momentin e votimeve në OKB.
Shefi i diplomacisë ruse foli gjithashtu për Iranin, duke e cilësuar “të paligjshme” përpjekjen e vendeve perëndimore për të rikthyer sanksionet ndaj Teheranit.
Fjalimi i Lavrov konfirmon strategjinë e Moskës për ta përdorur foltoren e OKB-së si skenë ku kritikon Perëndimin, ofron “gatishmëri për dialog” në Ukrainë, por njëkohësisht nuk heq dorë nga kërcënimet e drejtpërdrejta ndaj NATO-s dhe BE-së.
