Gjatë “Javës së Makinave” në Monterey, Kaliforni, një event elitar ku makina superluksoze dhe milionerë të heshtur mbushin rrugët e Pebble Beach – Lamborghini po përgatitet të zbulojë një model të ri ultra-ekskluziv: Fenomeno.
Burime të afërta me kompaninë italiane dhe media si CarScoops dhe Supercar Blog raportojnë se Fenomeno do të bazohet në modelin aktual Revuelto, por do të ofrojë më shumë fuqi se 1,015 kuaj-fuqi, duke e bërë atë ndoshta Lamborghini-n më të fuqishëm ndonjëherë.
Ndërsa kompania ende nuk e ka konfirmuar zyrtarisht ekzistencën e modelit, emri “Fenomeno” është regjistruar pranë Zyrës së Pronësisë Intelektuale të BE-së, çka ka nxitur spekulimet. Debutimi pritet të ndodhë gjatë “Pebble Beach Concours d’Elegance”.
Nuk dihet ende nëse ky model është një kundërpërgjigje për Ferrari SF90 XX, por një gjë është e sigurt: Lamborghini synon të bëjë bujë në një nga skenat më prestigjioze të automobilizmit global.
