Nesër, më 1 korrik 2025, hyn në zbatim marrëveshja dypalëshe mes Shqipërisë dhe Italisë për sigurimet shoqërore, e cila garanton njohjen dhe mbrojtjen reciproke të të drejtave për qytetarët që kanë kontribuar në sistemet e të dyja vendeve.
Instituti i Sigurimeve Shoqërore (ISSH) ka publikuar udhëzuesin teknik të zbatimit të marrëveshjes, një dokument që sqaron procedurat, kriteret dhe dokumentacionin e nevojshëm për përfitimin e pensioneve dhe të drejtave të tjera. Udhëzuesi do të jetë një mjet i rëndësishëm për qytetarët shqiptarë dhe italianë, duke thjeshtuar procesin e aplikimit.
Marrëveshja, e nënshkruar në Romë më 6 shkurt 2024, u finalizua gjatë vizitës së kryeministres italiane Giorgia Meloni në Tiranë, në maj 2024, ku dokumenti iu dorëzua kryeministrit Edi Rama gjatë samitit të Komunitetit Politik Europian. Ky hap shënon një avancim të rëndësishëm në mbrojtjen e të drejtave të qytetarëve të të dyja vendeve, duke forcuar bashkëpunimin mes Shqipërisë dhe Italisë.
