Gazeta ka raportuar dje për një person nga Shqipëria që ka përfunduar në prangat e Policisë së Kosovës, nën dyshimet se është përfshirë në një seri vjedhjesh të rënda në Gjakovë dhe rrethinë.
Siç njoftoi Policia, shtetasi shqiptar me inicialet R.M. është arrestuar në orët e para të mëngjesit të sotëm në fshatin Planqor të komunës së Gjakovës.
Bëhet fjalë për Rifat Madani, 55-vjeçar.
Hetimet kanë zbuluar se ai dyshohet për së paku 17 raste të vjedhjeve të rënda të ndodhura në qytetin e Gjakovës dhe disa fshatra përreth.
Gjatë kontrollit fizik, Policia i ka gjetur dhe sekuestruar një çantë me mjete të forta që dyshohet se janë përdorur për hapjen e dyerve, dy telefona celularë, një thikë dhe disa sende të tjera që dyshohet se lidhen me veprat penale.
Me urdhër të prokurorit, i dyshuari është dërguar në ndalim për 48 orë, ndërkohë që hetimet për identifikimin e rasteve të tjera të mundshme dhe grumbullimin e provave shtesë janë duke vazhduar.
