Një aksident i rëndë trafiku ka ndodhur të martën, më 09 dhjetor 2025, rreth orës 16:20, në Rrugën Nacionale N22.3, në hyrje të Leposaviqit, ku janë përfshirë dy automjete civile dhe disa persona kanë pësuar lëndime trupore.
Sipas të dhënave nga strukturat e afërta me hetimin, në aksident janë përfshirë: Peugeot, ngjyrë e verdhë, me drejtues B.M,, rreth 60-vjeçar, Volkswagen Golf, ngjyrë e zezë, me drejtues M.R..
Gazeta mëson se viktima është Vladan Milovanović.
Nga goditja janë lënduar të dy drejtuesit e automjeteve, si dhe pasagjerët V.Milovanović, I.D, rreth 26-vjeçare dhe E.B., rreth 26-vjeçare.
Dyshohet se deri te aksidenti ka ardhur kur automjeti Peugeot, duke lëvizur nga Leposaviqi në drejtim të Mitrovicës, në rrethana ende të paqarta ka kaluar në shiritin e kundërt të rrugës, duke u përplasur frontal me automjetin Golf, i cili po lëvizte në drejtimin e kundërt në shiritin e tij të rregullt.
Si pasojë e përplasjes, të lënduarit janë dërguar me autoambulancë në Spitalin e Mitrovicës Veriore. Pasi kanë marrë trajtimin mjekësor, të gjithë të lënduarit janë liruar për në shtëpi, përveç një pasagjeri nga automjeti “A”, i cili është mbajtur për trajtim të mëtejshëm.
Prokurorja kujdestare është njoftuar për rastin; ajo nuk ka dalë në vendin e ngjarjes, por ka udhëzuar që lënda të trajtohet në procedurë të rregullt. Hetimet janë në zhvillim.
