Një ngjarje e rëndë ka ndodhur pasditen e sotme në fshatin Kqiq i Madh, në Mitrovicë të Jugut, ku një i ri është gjetur pa shenja jete, ndërsa dyshohet se ka tentuar vetëvrasje.
Burime të besueshme nga strukturat e afërta me hetimin bëjnë të ditur se rasti ka ndodhur në zonën e varrezave të Pllanalive, ku një person dyshohet se ka tentuar të kryejë vetëvrasje me varje në kulmin e një shtëpie.
Në vendin e ngjarjes kanë dalë njësitë policore, njësitë e NJRSH-së si dhe emergjenca.
Zëdhënësi i Policisë për rajonin e Mitrovicës së Jugut, Avni Zahiti, në një prononcim për Gazetën ka thënë se viktima, 18-vjeçar, është sjellë pa shenja jete në spital.
“Njësitet relevante policore kanë dalë në vendin e ngjarjes, ndërsa hetuesit policorë, në koordinim me prokurorin e shtetit, kanë nisur hetimet për zbardhjen e rrethanave të rastit. Rasti është iniciuar dhe po hetohet si “Hetim mbi vdekjen””, ka thënë Zahiti.
Rreth orës 18:40, viktima është transportuar me autoambulancë drejt Spitalit Rajonal në Bajr – Mitrovicë Jug, por sipas mjekut kujdestar është konstatuar se i njëjti ishte pa shenja jete.
Viktima është identifikuar si Arlind Rudhani, 18-vjeçar.
Rrethanat e plota të ngjarjes pritet të sqarohen pas veprimeve hetimore.
