Ish-ushtruesi i detyrës së kryetarit të OVL-së së UÇK-së, Faton Klinaku, ka reaguar edhe sot lidhur me deklaratat e deputetit të Lëvizja Vetëvendosje, Fatos Geci, për ish-presidentin Hashim Thaçi.
Brenda më pak se 24 orësh, qëndrimet e Faton Klinaku duket se kanë kaluar nga një gjuhë e ashpër në një ton dukshëm më të kujdesshëm.
Dje, në reagimin e tij publik, ai nuk kurseu fjalët, duke deklaruar se “ai që e ofendon Hashim Thaçi është tradhtar e bir tradhtari”, deklaratë që u interpretua gjerësisht si e drejtuar ndaj deputetit të Lëvizja Vetëvendosje, Fatos Geci.
Por sot, i njëjti Klinaku ka zgjedhur një qasje tjetër. Ai është përpjekur të sqarojë se reagimi i tij nuk kishte të bënte drejtpërdrejt me Gecin, por me komentuesit në portale që, sipas tij, kanë ofenduar Thaçin.
“Çdo deputet jep përgjegjësi për fjalën e tij. Edhe pse nuk pajtohem me fjalimin e deputetit Geci, statusi im dje nuk ka pasur të bëjë me të, por me komentuesit nëpër portale që po e ofendojnë Hashim Thaçin duke ia sharë familjen dhe duke e quajtur si njeri të Serbisë.”
Pra, nga një deklaratë “pa filtër” në një sqarim të kujdesshëm – brenda vetëm 24 orësh.
Kjo kthesë e menjëhershme ngre pyetje të pashmangshme: Çfarë ndryshoi kaq shpejt? A pati reagime apo presion që e detyruan të zbusë qëndrimin? Apo thjesht kemi të bëjmë me një tërheqje të shpejtë pas një deklarate që shkaktoi reagime?
Në fund, mbetet dilema nëse kjo është një përpjekje për sqarim — apo një hap pas nga fjalët e forta të një dite më parë.
