Kryetarët e Komunave të Pejës, Gazmend Muhaxheri, të Lipjanit, Imri Ahmeti, dhe të Mitrovicës së Jugut, Bedri Hamza, kanë dorëzuar kërkesë në Komisionin Qendror të Zgjedhjeve (KQZ) për të hequr dorë nga marrja e mandatit të deputetit.
Kryetari i KQZ-së, Kreshnik Radoniqi, ka njoftuar se në vend të tyre, do të zëvendësohen: Arben Gashi për Gazmend Muhaxherin, Paris Guri për Imri Ahmetin dhe Rashit Qalaj për Bedri Hamzën.
Ka pasur disa mospajtime lidhur me procesin e zëvendësimit të këtyre mandateve.
Anëtari i PDK-së në KQZ, Ilir Gashi, ka theksuar se është e nevojshme që kryetarët e komunave të zëvendësohen menjëherë, pasi ata nuk mund të mbajnë njëkohësisht pozitën e kryetarit të komunës dhe atë të deputetit.
