Sekretari i Përgjithshëm i NATO-s, Mark Rutte, ka reaguar pas shkeljes së hapësirës ajrore të Polonisë nga Rusia, duke e cilësuar këtë veprim si “sjellje të pamatur”, pavarësisht nëse incidenti ishte i qëllimshëm apo aksidental. Ai theksoi se aleatët e NATO-s kanë shprehur solidaritet të plotë me Poloninë dhe se një vlerësim i plotë i situatës është duke u zhvilluar.
Rutte bëri të ditur se vendet anëtare të NATO-s, si Holanda, Italia, Polonia dhe Gjermania, ishin të përfshira në rrëzimin e dronëve rusë që kishin hyrë në hapësirën ajrore polake gjatë natës.
Sipas shefit të NATO-s, ky veprim është pjesë e masave parandaluese të aleancës për të mbrojtur integritetin territorial të vendeve anëtare dhe për të shmangur përshkallëzime të mëtejshme.
Ndërkohë, kryeministri polak, Donald Tusk, vlerësoi se situata është më e rrezikshme se çdo moment tjetër që nga Lufta e Dytë Botërore.
“Nuk kam asnjë arsye të pretendoj se jemi në prag të luftës, por është kaluar një vijë dhe kjo situatë është pakrahasueshëm më e rrezikshme se më parë”, tha Tusk gjatë fjalës së tij para parlamentit polak. Ai shtoi se incidenti e ka afruar Poloninë më shumë drejt një konflikti të hapur, duke nënvizuar rrezikun që kjo situatë paraqet për sigurinë e Evropës.
Incidenti ka ngritur shqetësime të mëdha në aleancën e NATO-s, duke nxitur thirrjen e konsultimeve mes vendeve anëtare dhe monitorimin e ngushtë të situatës nga ana e forcave ajrore.
