Drejtori i Përgjithshëm i Agjencisë Ndërkombëtare për Energjinë Atomike (IAEA), Rafael Grossi, ka paralajmëruar se sulmet e armatosura ndaj objekteve bërthamore, si ato të ndodhura së fundmi në Iran, nuk duhet të ndodhin kurrë, pasi mund të shkaktojnë lëshime radioaktive me pasoja të rënda globale.
Duke folur në një takim urgjent të IAEA-s, Grossi deklaroi se bota po përballet me një krizë serioze, ndërsa objektet bërthamore iraniane janë vënë në shënjestër të sulmeve ushtarake. Ai theksoi se ende ekziston një rrugë për diplomaci dhe u bëri thirrje palëve të përfshira që të rikthehen në tryezën e bisedimeve.
“Rajoni ka nevojë për paqe. Le të fillojë me rikthimin e inspektorëve tanë në objektet bërthamore të Iranit,” tha Grossi, duke konfirmuar se sulmet kanë shkaktuar dëme, përfshirë kratere në vendndodhjen Fordow.
