Pas ankesave të shumta të pranuara nga qytetarët lidhur me hedhjen e mbeturinave dhe dëmet që po shkaktojnë kompanitë e pandërgjegjshme, Drejtoria e Inspeksionit Komunal e udhëhequr nga drejtori Mujë Igrishta ka dalë në terren. Pas verifikimit të rasteve, javën e kaluar janë shqiptuar gjoba ndaj ndërtuesve të pandërgjegjshëm për hedhjen e mbeturinave dhe për mosmenaxhimin e ujërave fekale në vendpunishte.
Në të njëjtën kohë, kjo drejtori kishte obliguar kompanitë ndërtuese që brenda afatit prej 72 orësh të ndërmarrin veprimet e nevojshme ligjore për përmbushjen e obligimeve të tyre. Në të kundërtën, objektet – vendpunishtet do të konservohen.
Meqenëse, dy nga kompanitë ndërtimore të gjobitura nuk e kanë respektuar urdhëresën e dhënë nga Drejtoria e Inspekcionit, inspektorët sot kanë vendosur shiritat që ndalojnë çdo veprimtari punuese në këto objekte, deri në zbatimin e urdhëresës së dhënë për largimin dhe pastrimin e mbeturinave, si dhe trajtimin e ujërave fekale nga vendpunishtet ndërtimore.
Drejtori i Drejtorisë së Inspekcionit, Mujë Igrishta, ndër të tjera ka theksuar se ndaj kompanive ndërtimore do të ndërmerren edhe veprime të tjera ligjore për mosrespektimin e urdhëresës së dhënë nga inspektorët e kësaj drejtorie.
Veriu.info mëson se kompanive që sot u janë vënë shiritat e ndalimit të punimeve janë “Aurora Group” dhe “Premium Home”.
