- Shkruan Spartak Ngjela
Parisi po i kërkon Ramës të krijojë një epokë të re islame në Shqipëri, në mënyrë që të gjendet një arsye për të mos e pranuar Shqipërinë në Bashkimin Evropian.
Por kot lodhet Parisi e Rama gjithashtu.
Karakteri evropian i shqiptarëve vjen nga shekujt.
Asnjëra nga fetë në Shqipëri nuk e ka dëmtuar e nuk e dëmton dot karakterin evropian të shqiptarëve në kulturë.
Dhe shumë është lodhur edhe Beogradi për të dëmtuar imazhin perëndimor të qytetërimit në Shqipëri.
Asgjë nuk bëri dot; edhe pse pagoi shumë për këtë gjëndje të imponimit të orientalizmit fetar në Shqipëri.
Por dështoi.
Shqiptarët i merrnin paratë që Beogradi paguante; dhe qeshnin me ta.
Dhe tani po kuptohet që Beogradi është tërhequr, sepse mënyrën artificiale të një imponimi oriental fetar në Shqipëri, e kuptuan që ajo qëndronte jashtë natyrës së shqiptarisë.
Dhe tani gjithçka po ecën në suazën e shqiptarisë në shkencë, në letërsi, në histori dhe në artin shqiptar.
Dhe dihet se dështimi gjithmonë është i hidhur, kur ajo që ti ke kërkuar ta arrish ka qenë më shumë iluzion për shqiptarët e Shqipërisë, të cilët gjithmonë kanë ecur me idenë e ndritur të Rilindjes Kombëtare të Shqipërisë:
Feja e shqiptarit është shqiptaria.
Dhe këtu, sigurisht që i vendoset fjala The End të gjithë marramendjes serbe të Beogradit fetar dhe politik; të organizuar në vakum kundër shqiptarisë në 30 vitet e fundit; njëlloj si edhe gjatë njëqind viteve më parë e në vijim, deri më sot.
Forca e shqiptarisë vjen nga forca e maleve të saj; të cilën e provuan me radhë të gjitha ato forca të huaja që kërkuan të zhduknin shqiptarinë – nga romakët te grekët dhe nga grekët te bullgarët e serbët gjithashtu, në historinë heroike të Ilirisë, Arbërisë dhe Shqipërisë, deri në ditët e sotme, e cila është realisht koha e Arbërisë moderne me të dy shtetet e saj:
Shqipëri dhe Kosovë.
Prandaj…
Kjo kohë ballkanike tani është e shqiptarëve; dhe kush nuk e di – ta mësojë, ta kuptojë në thellësi historike, dhe të mos lodhet kot.
