Avokati Arianit Koci i ka shkruar një letër Kryeministrit në detyrë, Albin Kurti lidhur me insistimit për emrin e Albulena Haxhiut për Kryeparlamentare, duke e cilësuar si një “kapriçio personale” të tij.
Sipas Kocit, Kurti mund ta zhbllokojë Kuvendin, por kjo siç thotë ai është një bllokadë e qëllimshme, e që pasojat po bien mbi shtetin dhe qytetarët.
“Nuk është më koha për inate personale, as për ngulm në kandidatura që nuk i kanë votat e duhura”, shkruan mes tjerash Koci.
Letra e plotë:
Z. Albin Kurti,
Ngulmi me Albulena Haxhiun nuk është më bindje politike, as e drejtë e fituar në zgjedhje.
Është kapriçio personale – që po e mban peng Kuvendin e Kosovës, po i ngrin proceset dhe po i djeg milionat e popullit.
Paraliza është totale: përfaqësimi politik nuk funksionon, ekonomia është e ngujuar, shteti po mrizon.
Ju keni mundësi me e zhblloku këtë situatë.
Keni fuqi, keni ndikim.
Sepse kjo tashmë nuk është më përballje me kundërshtarët politikë.
Është bllokim i qëllimshëm institucional.
Dhe pasojat po bien mbi shtetin. Mbi qytetarin.
E populli po sheh. Po kupton. Po mban mend.
Në anën tjetër, me fitoren në zgjedhjet e fundit dhe me pozicionin që e keni sot, ju takon juve me e marrë rolin përbashkues.
Nuk është më koha për inate personale, as për ngulm në kandidatura që nuk i kanë votat e duhura.
Sepse mbi të gjitha – me opozitën nuk jeni në armiqësi.
Janë kundërshtarë politikë, por janë deputetë të këtij vendi – me të njëjtin legjitimitet nga qytetarët, si ju.
Thellësisht besoj që qëllimin e keni të njëjtë, të gjithë ju – pozitë e opozitë:
Ta forconi shtetin dhe t’ua siguroni qytetarëve një jetë më të mirë.
Prandaj, ndërrimi i kandidaturës – në rastin tuaj – nuk është humbje e betejës politike.
Përkundrazi – është fitore. Madje fitore e madhe, sepse po e jepni një zgjidhje kreative, po e shtyni procesin përpara, po e çoni shtetin drejt funksionalitetit.
E këtë mund ta bëjë vetëm një burrështetas – dikush që është mbi mentalitetin primitiv të kasabasë sonë politike.
Merreni përgjegjësinë që e keni. Ndryshojeni kandidaturën dhe zhbllokojeni Kuvendin.
Mos e bëni Kosovën kolateral të kokëfortësisë.
Unë, si qytetar i këtij vendi – si njeri që ia don të mirën Kosovës dhe nuk ka atdhe tjetër – nuk do të ndalem.
Do të kërkoj përditë dhe pa kompromis, që Kuvendi të funksionalizohet.
Arianit Koci
26 Qershor 2025
Prishtinë
