Organizata e Ballit Kombëtar Demokrat, pas një mbledhjeje të mbajtur nga Kryesia, ka vendosur unanimisht që në zgjedhjet e ardhshme të përkrahë Lëvizjen Vetëvendosje dhe kryeministrin Albin Kurti, shkruan GazetaKosova.net
Kryetari i organizatës, Gazmend Islami, bëri të ditur se ky vendim vjen si rezultat i një analize të thellë të qeverisjes 4-vjeçare të Qeverisë Kurti, e cila sipas tij ka arritur suksese të rëndësishme në përforcimin e sovranitetit të Kosovës, zhvillimin ekonomik dhe përmirësimin e sektorëve kyç si arsimi dhe shëndetësia.
“Qeveria Kurti ka përforcuar sovranitetin e vendit dhe ka siguruar përkrahje më të madhe ndërkombëtare. Ne besojmë se kjo dekadë i përket Albin Kurtit dhe politikave të tij të mençura, të frymëzuara nga idetë e rilindasve shqiptarë,” deklaroi Islami.
Sipas tij, përkrahja e Ballit Kombëtar Demokrat për Lëvizjen Vetëvendosje nuk vjen si rezultat i pazareve politike, por si një angazhim për të mirën e vendit. Islami kritikoi ashpër opozitën dhe disa qarqe mediatike, duke i cilësuar si të ndikuara nga agjenda hibride të Moskës dhe Beogradit.
Vendimi për përkrahjen e Lëvizjes Vetëvendosje u miratua unanimisht nga 27 anëtarët e Kryesisë së Ballit Kombëtar Demokrat. Organizata ka paralajmëruar gjithashtu takime me elektoratin në të gjitha degët e saj në Kosovë për të informuar më shumë rreth këtij vendimi dhe përkrahjes së kandidatëve të LVV-së për Kuvendin e Kosovës.
Ky hap i Organizatës së Ballit Kombëtar Demokrat shënon një përkrahje të rëndësishme për Lëvizjen Vetëvendosje në prag të zgjedhjeve të 9 shkurtit.
**KOMUNIKATË PËR MEDIA**
**Organizata e Ballit Kombëtar Demokrat, Prishtinë**
Në mbledhjen e mbajtur nga Kryesia e Organizatës së Ballit Kombëtar Demokrat, u morën disa vendime të rëndësishme për zgjedhjet e 9 shkurtit.
**Vendimi kryesor** ishte që Organizata jonë i fton të gjithë anëtarët dhe simpatizantët e saj në nivel vendi që kësaj radhe të përkrahin **Lëvizjen Vetëvendosje** dhe kryeministrin **Albin Kurti**.
Pas një analize të thellë të qeverisjes 4-vjeçare, si në aspektin politik, gjeopolitik, arsimor dhe të zhvillimit të shëndetësisë, kemi ardhur në përfundimin se Qeveria ka realizuar punë të mira për vendin. Në veçanti:
– **Përforcimi i sovranitetit** të Kosovës, që është themeli i një shteti sovran.
– Zhvillimi i qëndrueshëm dhe përkrahja ndërkombëtare, pavarësisht përpjekjeve të opozitës për ta minimizuar këtë sukses.
Gjatë mandatit të tij, Kryeministri Albin Kurti ka ndërmarrë disa veprime në veriun e Kosovës, një rajon me shumicë serbe, për të forcuar sundimin e ligjit dhe integrimin e plotë në strukturat shtetërore të Kosovës.
Sundimi i Ligjit dhe Lufta kundër Krimit të Organizuar:
Qeveria Kurti ka ndërmarrë operacione të shumta kundër krimit të organizuar në veri. Sipas të dhënave, janë arrestuar mbi 3,800 persona për vepra të rënda penale, përfshirë mbi 300 zyrtarë publikë. Janë shkatërruar 16 laboratorë droge, nga të cilët nëntë në Mitrovicën e Veriut. Gjithashtu, janë mbyllur rrugë ilegale përgjatë kufijve për të parandaluar kontrabandën dhe kalimet e paligjshme. Në Mitrovicën e Veriut janë mbyllur 24 rrugë të tilla të përdorura nga strukturat e krimit të organizuar.
Organizata jonë e sheh këtë përkrahje si një hap të domosdoshëm dhe të drejtë për të mirën e vendit, të bazuar vetëm në interesa kombëtare, dhe jo në pazare politike.
Fatkeqësisht, në skenën politike kemi një opozitë të përçarë dhe shpesh të gatshme të pranojë cenimin e sovranitetit në veri të vendit, përkundër përpjekjeve të suksesshme të Qeverisë Kurti për të mbrojtur interesat e Kosovës. Në të njëjtën linjë janë edhe disa qarqe mediatike, të cilat shpesh ndihmojnë agjendat hibride të dirigjuara nga Moska, Beogradi dhe mbështetësit e tyre brenda vendit.
Për të siguruar vazhdimësinë e zhvillimit ekonomik dhe sovranitetit të vendit, besojmë se kjo dekadë dhe e ardhmja i përket kryeministrit Albin Kurti. Me politikat e tij të mençura, biografinë e pastër dhe idetë e frymëzuara nga rilindasit tanë, ai jo vetëm që po çon përpara Kosovën, por edhe çështjen shqiptare në Ballkan.
Vendimi për të përkrahur Lëvizjen Vetëvendosje u mor me **unanimitet të plotë** nga 27 anëtarët e Kryesisë.
Në ditët në vijim, do të njoftojmë elektoratin tonë në të gjitha degët e Kosovës për tubime dhe përkrahjen e kandidatëve më të denjë për Kuvendin e Kosovës.
**Kryetari i Organizatës së Ballit Kombëtar Demokrat,**
**Gazmend Islami**
