Njeriu më i pasur në botë, Elon Musk, po përballet me një proces të madh gjyqësor kundër OpenAI dhe drejtorit të saj Sam Altman, në një rast ku kërkon rreth 150 miliardë dollarë dëmshpërblim.
Çështja po shqyrtohet nga gjyqtarja federale Yvonne Gonzalez Rogers, e cila pritet të ketë fjalën vendimtare në fund të procesit. Ajo njihet për trajtimin e rasteve të rëndësishme në industrinë e teknologjisë dhe për qasjen e saj të rreptë në sallën e gjyqit.
Musk, një nga bashkëthemeluesit e OpenAI në vitin 2015, pretendon se është mashtruar lidhur me misionin fillestar të kompanisë, e cila në atë kohë funksiononte si organizatë jofitimprurëse.
Gjatë seancave të fundit, gjyqtarja Gonzalez Rogers ka ndërhyrë disa herë për të vendosur rendin në sallë, përfshirë edhe momentin kur i kujtoi Musk se “ai nuk është avokat”, pasi tentoi të drejtonte vetë mënyrën e pyetjeve ndaj palës kundërshtare.
Sipas vëzhguesve të procesit, gjyqtarja shihet si një figurë autoritare dhe e drejtë, e cila mban kontroll të plotë mbi procedurat gjyqësore.
Edhe pse një juri prej nëntë anëtarësh pritet të japë një rekomandim deri në fund të muajit, vendimi përfundimtar do të merret nga gjyqtarja Gonzalez Rogers, e cila do të ketë fjalën e fundit në këtë rast të profilit të lartë.
