Presidenti i SHBA-së, Donald Trump , pohon se raketat Patriot për Ukrainën janë dërguar tashmë nga Gjermania, sipas Bloomberg. Trump shtoi se nuk ka folur me homologun e tij rus, Vladimir Putin, që kur njoftoi tarifa dytësore ndaj Moskës nëse nuk ka një marrëveshje për Ukrainën brenda 50 ditëve. Administrata Trump po punon për pesë ose gjashtë marrëveshje tregtare dhe mund të shpallë dy ose tre para 1 gushtit, kur do të fillojnë pagesat reciproke të tarifave të njoftuara në letrën e presidentit të SHBA-së.
Ndwrkohw, forcat ruse nisën gati 100 sulme ndaj 33 vendbanimeve në rajonin e Sumy brenda 24 orëve, duke shkakuar një viktimë në komunitetin e Velykypysarivska, raportoi Ukrinform, duke cituar administratën ushtarake rajonale të Sumy. Numri më i lartë i sulmeve u regjistrua në distriktet Sumy dhe Shostka. Qyteti verilindor i Kharkiv u vu nën zjarr intensiv armik, raportoi guvernatori rajonal Oleh Syniehubov, duke shpjeguar se të paktën 17 shpërthime ndodhën në vetëm 20 minuta.
Të paktën tre persona u plagosën në Kharkiv, ku shpërtheu një zjarr i madh. Qyteti i Kryvi Rih, në Oblastin e Dnipropetrovsk, u shënjestrua gjithashtu nga një sulm masiv nga 28 dronë Shahed. Oleksandr Vikul, kreu i administratës ushtarake të qytetit, raportoi ndërprerje të energjisë në shkallë të gjerë dhe shkatërrimin e një objekti industrial. Një djalë 17-vjeçar u plagos dhe është shtruar në spital në gjendje të rëndë.
Njëzet e tetë dronë rusë shënjestruan rajonin e Vinnytsia-s (Ukraina qendrore-perëndimore), duke goditur kryesisht objekte industriale, tha në Facebook Natalya Zabolotna, një zyrtare e administratës ushtarake lokale. Shtatë persona u plagosën, dy prej të cilëve pësuan “djegie të rënda”, shtoi ajo.
Paralelisht me intensifikimin e sulmeve ndaj Ukrainws, Rusia “i fton të gjithë” të ndihmojnë Kievin të rifillojë negociatat direkte dhe të caktojë një raund të ri. Zëdhënësi i Kremlinit, Dmitry Peskov, u tha gazetarëve, duke iu përgjigjur agjencisë së lajmeve Tass në lidhje me ndërhyrjen e mundshme të Moskës me partnerët e saj për të siguruar një bashkëpunim të tillë.
“Ne i ftojmë të gjithë ta bëjnë këtë. Në këtë rast, rolin kryesor e luajnë përpjekjet ndërmjetësuese të Shteteve të Bashkuara, Presidentit Trump dhe ekipit të tij. Janë bërë shumë deklarata, shumë fjalë zhgënjimi”, shpjegoi ai.
“Por sigurisht, shpresojmë që, paralelisht, presioni do të ushtrohet edhe ndaj palës ukrainase. Sepse, siç thashë, për momentin, duket se të gjitha fjalët e mbështetjes interpretohen nga Kievi jo si një shenjë paqeje, por si një shenjë lufte, e vazhdimit të luftës”, shtoi ai.
