Një tentativë për të vjedhur derivate në një vendpunishte të hekurudhës në Vushtrri është ndërprerë në kohë, ndërsa katër persona kanë përfunduar në prangat e Policisë.
Burimet e Gazetës Sinjali bëjnë me dije se ngjarja ka ndodhur pak para mesnatës së 13 qershorit në fshatin Shtitaricë, ku roja e një vendpunishteje ka vërejtur një automjet të dyshimtë dhe disa persona pranë një ekskavatori.
Sipas informacioneve që posedon Sinjali, të dyshuarit kishin hapur me forcë kapakun e rezervuarit të ekskavatorit dhe, të pajisur me bidonë e gyp plastik, po tentonin të nxirrnin naftë nga makineria e rëndë.
Pas alarmimit të Policisë, njësitet kanë arritur t’i lokalizojnë dhe arrestojnë katër të dyshuarit, të cilët janë identifikuar si:
Liridon Zekaj (25 vjeç)
Flamur Mehmeti (28 vjeç)
Getuar Geci (21 vjeç)
Kreshnik Rama (21 vjeç)
Gjatë kontrollit të automjetit të tyre janë gjetur disa bidonë dhe një gyp plastik, të cilat dyshohet se do të përdoreshin për bartjen e derivateve.
Të katër janë shoqëruar në Stacionin Policor në Vushtrri dhe janë intervistuar nga hetuesit. Me urdhër të Prokurorit kujdestar, rasti është iniciuar si “Vjedhje e rëndë në tentativë”, ndërsa të dyshuarve u është caktuar masa e ndalimit prej 48 orësh.
Ajo që nisi si një operacion i heshtur për të mbushur bidonët me naftë, përfundoi me katër palë pranga dhe një dosje penale mbi tavolinën e Prokurorisë.
