Prokuroria Themelore në Mitrovicë dhe Policia e Kosovës kanë realizuar një aksion në orët e hershme të mëngjesit sot në Vushtrri, ku janë arrestuar katër (4) persona, tre (3) prej tyre nën dyshimin e kryerjes së veprës penale “Detyrimi”, si dhe një (1) person i cili ka qenë në arrati për veprat penale “Lëndimi i lehtë trupor“ dhe “Arratisja e personave të privuar nga liria“.
Aksioni me urdhëresë të Gjykatës Themelore në Mitrovicë (dega Vushtrri) është realizuar në pronat e familjes Gerbeshi në fshatin Ropicë të Vushtrrisë dhe në një lokacion në qytetin e Vushtrrisë.
Katër të arrestuarit janë: Avdullah Gerbeshi, Emin Gerbeshi, Rrahman Gerbeshi, dhe Kadri Gerbeshi.
“Prokuroria Themelore në Mitrovicë në koordinim me Policinë e Kosovës, respektivisht Drejtorinë për Hetimin e Krimit të Organizuar dhe Krimeve të Rënda, ka bërë realizimin e urdhëresës së Gjykatës Themelore në Mitrovicë – dega Vushtrri për kontrollin e shtëpive të katër (4) personave të dyshuar, ku që nga orët e hershme të mëngjesit janë kontrolluar gjithsej tri (3) lokacione, dy (2) në fshatin Ropicë të Vushtrrisë dhe një (1) lokacioni në qytetin e Vushtrrisë. Nga ky operacion policor janë arrestuar tre (3) persona lidhur me dyshimin e kryerjes së veprës penale “Detyrimi”, si dhe një (1) person i cili ka qenë në arrati për veprat penale “Lëndimi i lehtë trupor“ dhe “Arratisja e personave të privuar nga liria“. Me vendim të prokurorit, katër (4) të pandehurit ndalohen për 48 orë, ndërkaq operacioni është duke vazhduar”, thuhet në njoftimin e prokurorisë.
