Lamin Jamal festoi ditëlindjen e tij të 18 në Ibiza me miq, futbollistë, influencues të rrjeteve sociale dhe vajza që kishin një qëllim: të argëtonin futbollistin e ri. Por kishte disa kërkesa të çuditshme për këto vajza. Kjo u zbulua nga Klaudia Kalvo, një vajzë në profilin e së cilës në Instagram shkruhet se ishte “Miss Teen Spain 2021” dhe “Miss Teen Europe 2022”. Ajo e refuzoi ftesën e Jamal për të marrë pjesë në festën e ditëlindjes. Ajo tha se u kontaktua për të mbledhur 12 vajza për një festë të planifikuar të shtunën e kaluar.
Kriteret e përzgjedhjes ishin thjesht fizike.
“Ata u përqendruan më shumë në madhësinë e gjoksit dhe ngjyrën e flokëve. Ata kërkonin gra bionde me përmasa shumë specifike të gjoksit,”- tha ajo, duke zbuluar disa detaje të tjera rreth festës së lojtarëve të Barcelonës dhe ekipit kombëtar spanjoll në të cilën ajo refuzoi të merrte pjesë.
“Më thanë se ishte një shumë specifike e shënuar me dy shifra, midis 10,000 dhe 20,000 euro. Të japin një kartë për shpenzimet e tua. Në momentin që ta japin atë kartë, nuk e di se ndaj çfarë gjëje po e ekspozon veten ose çfarë presin ata nga ti. Nuk lejoheshin telefonat, kamerat, droga. Gjithçka është e përfshirë: fluturimet, hoteli, ushqimi dhe çfarëdo që vendosni të shpenzoni, ndërsa jeni në ishull duke u përgatitur për festën. Vendndodhja e saktë do të ndahej disa orë para se të fillonte festa. Diskrecioni është i domosdoshëm”, thuhej në ftesë.
Jamal është kritikuar ashpër për disa polemika që ndodhën në festën e tij, pasi po përballet me veprime ligjore për shkak se thuhet se ka përdorur artistë që vuajnë nga sindroma e “nanizmit” për ta argëtuar. Edhe pse filmimi në festë ishte rreptësisht i ndaluar, përveç atyre me autorizim të posaçëm, dhe të ftuarit duhej të dorëzonin telefonat e tyre celularë para se të hynin në festë, dikush arriti të filmonte personat me nanizëm që futeshin në festë.
Me këtë rast, ka folur ADEE, Shoqata e Personave me Akondroplazi dhe Displazi të Tjera të Kockave në Spanjë, e cila, siç thuhet në faqen e saj të internetit, është e angazhuar në ofrimin e mbështetjes, shërbimeve shëndetësore, dukshmërisë dhe mbrojtjes së të drejtave të personave me aftësi të kufizuara të lartpërmendura.
“Gjatë festimit, disa njerëz me shtat të shkurtër u punësuan për të marrë pjesë në aktivitete argëtuese, pa asnjë qëllim tjetër përveçse të shërbenin si atraksion dhe spektakël. Është absolutisht e papranueshme që në shekullin e 21, njerëzit me shtat të shkurtër vazhdojnë të përdoren vetëm si argëtim ose atraksione në festa private,”- tha presidentja e shoqatës, Karolina Puente.
ADEE njoftoi se do të ndërmarrë hapa ligjorë dhe socialë për të mbrojtur dinjitetin e personave me aftësi të kufizuara, duke theksuar se veprime të tilla shkelin ligjin, por edhe vlerat themelore të një shoqërie që përpiqet për barazi dhe respekt. Lamin Jamal ende nuk ka komentuar publikisht mbi akuzat, dhe as klubi dhe as ekipi i tij nuk kanë lëshuar një deklaratë zyrtare.
Festa u zhvillua në Masia Alkazar del Garraf dhe në të morën pjesë rreth 250 të ftuar, përfshirë shumë figura të njohura nga bota e muzikës dhe sportit, si piloti i Formula 1 Sharls Lëklerk dhe këngëtarët Bad Gial, Duki, Niki Nikol, Morad dhe të tjerë. Pjesa më e madhe e skuadrës së Barcelonës ishte gjithashtu e pranishme, megjithëse nuk qendruan gjatë për shkak të angazhimeve të nesërmen.
