Kapiteni i Anglisë, Harry Kane, ka deklaruar se skuadra e tij është e përgatitur për çdo situatë jashtë sportive që mund të ndodhë gjatë udhëtimit për ndeshjen kundër Serbisë.
Sulmuesi i Bayern Munich kujtoi rastet e ngjashme në të kaluarën dhe theksoi se ekipi anglez e njeh mirë protokollin e UEFA-s për përballimin e thirrjeve raciste.
“Kemi përjetuar një situatë të tillë në ndeshjen kundër Bullgarisë. UEFA ka përgatitur një protokoll për këto raste dhe ne e njohim shumë mirë. Shpresoj shumë të mos kemi nevojë që ta përdorim në takimin e radhës. Nëse do të dëgjojmë kore raciste apo situata të tilla të ngjashme, e dimë se çfarë do të bëjmë. Jemi të fokusuar në këtë ndeshje dhe kërkojmë që ta fitojmë atë.”, u shpreh Kane.
Ndeshja nuk do të ketë atmosferën e zakonshme në stadiumin “Rajko Mitic”, pasi Serbia është e dënuar nga UEFA me reduktim të numrit të tifozëve. Ky vendim erdhi pas incidenteve me sfond racist që ndodhën në qershor, gjatë përballjes ndaj Andorrës.
