Politikat e reja të Donald Trump në ekonomi, diplomaci dhe strategji globale, të shoqëruara me largime masive nga administrata federale, kanë krijuar një klimë të pasigurt për të ardhmen e sigurisë kibernetike në SHBA. Kjo u bë e dukshme javën e kaluar në dy konferencat më të mëdha të sigurisë dixhitale në Las Vegas: Black Hat dhe Defcon.
“Ne nuk po tërhiqemi, por po ecim në një drejtim të ri”, tha Robert Costello, drejtues i teknologjisë në Agjencinë për Sigurinë Kibernetike dhe Infrastrukturën (CISA). Por “drejtimi i ri” nënkupton shkarkime dhe spastrime politike.
Trump ka nisur të largojë zyrtarët që konsiderohen si “të pabesueshëm” ndaj axhendës së tij. Ai urdhëroi revokimin e sigurisë së klasifikuar për ish-drejtorin e CISA, Chris Krebs. Pas një sulmi nga aktivistja e ekstremit të djathtë Laura Loomer, iu hoq edhe një emërim akademik Jen Easterly-t, ish-drejtores së CISA, e cila ishte planifikuar të ligjëronte në Akademinë Ushtarake të West Point. Mesazhi është i qartë: kush kritikon, përjashtohet.
Ish-shefi i NSA: Teknologjia është bërë politike
Në këtë klimë tensioni, Paul Nakasone, ish-drejtor i Agjencisë së Sigurisë Kombëtare dhe ish-komandant i Cyber Command, u ngjit në skenë në Defcon për një bisedë me themeluesin e konferencës, Jeff Moss. Tema ishte qartazi politike: inteligjenca artificiale, krimi kibernetik dhe aleancat strategjike.
“Në këtë botë, teknologjia është bërë politike. Secili prej nesh është i konfliktuar”, tha Moss. Nakasone dha një shembull konkret: në janar Trump prezantoi projektin “Stargate” për inteligjencën artificiale, i mbështetur nga miliarderë si Larry Ellison i Oracle, Masayoshi Son i SoftBank dhe Sam Altman i OpenAI. “Dy ditë më pas, doli platforma gjigante e AI nga Kina, DeepSeek. Rastësi e çuditshme”, tha ai me ironi.
Nakasone theksoi edhe problemin e brezave mes qeverisë amerikane dhe sektorit privat të teknologjisë. “Kur takoja inxhinierë në Silicon Valley, Teksas apo Boston, isha dyfish më i vjetër se ata. Kur kthehesha në Washington, unë isha më i riu në tavolinë. Ky është një problem serioz për kombin”, tha ai.
Rreziku që po shpërthen: ransomware
Një nga shqetësimet më të mëdha të Nakasone ishte sulmi me ransomware, një formë shantazhi dixhital që ka gjunjëzuar kompani, spitale dhe institucione amerikane. “Ne nuk po bëjmë progres. Duhet të mendojmë ndryshe për ta përballuar këtë”, paralajmëroi ai.
A mund të mbetet Amerika neutrale?
Diskutimi mori një kthesë më politike kur Moss pyeti: “Si mund të mbetesh neutral në një botë ku luftërat dhe konfliktet po shtohen? Ukraina, Izraeli, Rusia, Irani, dhe vetë Amerika janë në qendër të krizave. Kush mund të qëndrojë i paanshëm?”.
Nakasone pranoi se bota po futet në një periudhë të rrezikshme. “Vitet 2025 dhe 2026 do të jenë vendimtare. Vitin tjetër kur të takohemi përsëri këtu, nuk besoj se do të mund të themi se jemi ende neutralë. Do të jetë jashtëzakonisht e vështirë”, tha ai.
