Presidenti i Federatës Hungareze të Futbollit dhe njëherësh nënkryetari i FIFA-s, Sandor Csanyi, ka kritikuar ashpër presidentin e FIFA-s, Gianni Infantino, duke vënë në pikëpyetje mënyrën e tij të udhëheqjes së organizatës.
Sipas The Guardian, Csanyi i ka dërguar një letër Infantinos, në të cilën ka deklaruar se ka “humbur besimin” që më parë kishte tek ai.
Zyrtari hungarez ka ngritur shqetësime lidhur me vendimmarrjen profesionale, standardet etike dhe cilësitë drejtuese të presidentit të FIFA-s.
“Besimi im në aftësinë tuaj për të udhëhequr me sukses dhe në mënyrë efektive FIFA-n, në përputhje me vlerat e përbashkëta që më parë formonin bazën e bashkëpunimit tonë, është minuar”, ka shkruar Csanyi.
Kritikat e tij konsiderohen të pazakonta, pasi vijnë nga një prej zyrtarëve më të lartë të FIFA-s dhe një nga nënkryetarët e organizatës.
Deklaratat e Csanyit shtojnë presionin ndaj Infantinos, duke nxjerrë në pah pakënaqësitë brenda strukturave të larta të futbollit botëror.
