Der Spiegel: Vrasja e Gërvallëve dhe Kadri Zekës ishte ekzekutim i planifikuar politik
Revista prestigjioze gjermane Der Spiegel në numrin e saj të 25 janarit 1982 publikoi një nga raportimet më të detajuara për vrasjen e Jusuf Gërvallës, Bardhosh Gërvallës dhe Kadri Zekës, duke e cilësuar atentatin si një ekzekutim të organizuar nga shërbimi sekret jugosllav (SDB).
Në artikullin me titull “Das ganze sieht nach Hinrichtung aus” (“E gjithë duket si ekzekutim”), revista përshkruan me detaje momentin e sulmit ndaj automjetit BMW 316 ku ndodheshin tre veprimtarët shqiptarë në ekzil. Sipas raportimit, makina po dilte mbrapsht nga garazhi kur, nën dritën e një llambe rruge, dy persona të armatosur hapën zjarr nga një distancë rreth tre metra. Pas të shtënave, atentatorët u afruan pranë automjetit për t’u siguruar për efektin e plumbave dhe më pas u larguan me vrap.
Policia gjeti në veturë:
Bardhosh Gërvallën (31 vjeç), shoferin, të goditur nga gjashtë plumba, të vdekur pas timonit. Kadri Zekën (28 vjeç), të vrarë nga dy plumba në pjesën e sipërme të trupit. Jusuf Gërvallën (36 vjeç), të plagosur rëndë nga dy goditje.
Sipas Der Spiegel, viktimat u qëlluan gjithsej 12 herë me pistoleta të kalibrit 7.65, me goditje fatale në zemër, mushkëri dhe qafë. Një polic në vendngjarje citohet të ketë thënë:
“E gjithë duket si ekzekutim.”
“Ishte SDB”
Momenti më tronditës i raportimit është dëshmia e fundit e Jusuf Gërvallës. Sipas revistës, ai, ende i vetëdijshëm pas plagosjes, i pëshpëriti policëve:
“Das war der SDB” –
“Ishte shërbimi sekret jugosllav.”
Këto fjalë u interpretuan si identifikim i drejtpërdrejtë i autorëve dhe konfirmim se atentati kishte motiv politik.
Konteksti politik
Der Spiegel shkruan se pas atentateve ndaj emigrantëve kroatë, regjimi i Beogradit kishte nisur një fushatë të re represive edhe kundër shqiptarëve nga Kosova në ekzil. Të tre viktimat ishin të njohur si kundërshtarë aktivë të qeverisë jugosllave.
Jusuf Gërvalla ishte botues i gazetës “Zëri i Kosovës” dhe kishte folur publikisht për rezistencë të armatosur. Bardhosh Gërvalla punonte në një qendër këshillimi social për punëtorët jugosllavë në Ludwigsburg. Kadri Zeka ishte gazetar dhe bashkëpunëtor i së njëjtës gazetë.
Revista përmend se aktivitetet e SDB-së ishin intensifikuar veçanërisht pas trazirave në Kosovë në pranverën e vitit 1981, nga frika se diaspora shqiptare po shndërrohej në faktor destabilizues për Jugosllavinë.
