Ish-ushtaraku Hafir Hoxha, ka folur lidhur me zhvillimet politike në Kosovë si dhe për akuzat e ndërsjella mes liderëve politikë.
Hoxha është shprehur se është shqetësuese mënyra se si njerëz me ndikim mund të përfshihen, me vetëdije ose pa dijeninë e tyre, në luftën speciale dhe hibride serbe.
“Akuzat mes liderëve si antikombëtarë për njëri-tjetrin, si fenomen, janë më shumë serioze sesa e mendojnë ata që i bëjnë, sidomos kur akuzat për spiunazh, tradhti, bashkëpunim me shërbime të huaja ose veprimtari kundër shtetit përdoren si armë politike pa prova. Problemi nuk është vetëm se dëmtohet reputacioni i një politikani. Kur këto akuza përsëriten vazhdimisht në rrjetet sociale, ato mund të: krijojnë frikë dhe panik te qytetarët;
nxisin urrejtje dhe përçarje shoqërore; minojnë besimin në institucionet e shtetit; krijojnë perceptimin se vendi është i mbushur me “tradhtarë” dhe “spiunë”; e zhvendosin debatin nga faktet dhe programet politike te sulmet personale; dhe, nëse një akuzë ka vërtet bazë, mund të dëmtojnë edhe hetimin, duke e kthyer atë në propagandë publike”, ka thënë ai.
Tutje, Hoxha ka theksuar se një fenomen i tillë po vërehet edhe në Kosovë.
“Kjo po ndodhë në Kosovë. Shumë politikanë janë duke i shfrytëzuar këto metoda të degradimit dhe përçarjes, pa e ditur se këto janë armë të zgjatura nga lufta hibride serbe dhe se edhe këta, me padijen e tyre, janë në shërbim të saj! Parimi duhet të jetë shumë i thjeshtë: nëse dikush ka prova se një politikan ka kryer vepër penale, sidomos spiunazh ose bashkëpunim me shërbime të huaja, provat duhet t’u dorëzohen organeve kompetente dhe të kërkohet hetim. Rrjetet sociale nuk janë gjykatë dhe një etiketim nuk është provë”, ka vlerësauar ai.
Sipas tij, një luftë e tillë e brendshme informuese mund të jetë veçanërisht e rrezikshme për Kosovën.
“Në Kosovë, një luftë e tillë e brendshme informuese mund të jetë veçanërisht e rrezikshme, sepse kundërshtari politik mund të paraqitet jo thjesht si kundërshtar, por si armik i shtetit. Kjo e bën shumë më të vështirë një debat demokratik normal.
Dallimi është ky:
Kritika politike → demokraci.
Akuza me prova → çështje për drejtësinë.
Akuza pa prova, të përdorura për manipulim → propagandë dhe dezinformim.
E kjo po ndodhë më së shumti dhe askush nuk jep llogari pse veprojnë kundër kolegëve politikë me këtë strategji denigruese!? Dhe kjo vlen për të gjitha partitë dhe të gjithë liderët, pa përjashtim. Mos përdorni strategji dhe elemente të luftës hibride serbe për garë politike mes jush! Mos u bëni argatë e ushtarë të luftës hibride për të përçarë liderët politikë dhe popullin, synim i qartë i luftës speciale serbe që e zhvillon tani dhe që i përdor njerëzit me ndikim! Mblidhni fakte, dërgoni dëshmitë në gjykatë, lëreni fjalën drejtësisë. Mos shpallni aktgjykim ju në rrjetet sociale për askënd!”, ka përfunduar Hoxha.
