Mimoza Kusari-Lila, shefja e grupit parlamentar të Lëvizjes Vetëvendosje, ka tentuar të moralizojë paksa me Listën Serbe, parti kjo me të cilën koordinohej se si të votohej në Kuvend përgjatë nomenklaturës së kaluar.
Ajo me anë të një shkrimi në ‘Facebook’ ka deklaruar se Partia Demokratike e Kosovës (PDK) dhe Lidhja Demokratike e Kosovës (LDK) kanë qëndrime të njëjta me Listën Serbe.
Udhëheqësja e deputetëve të VV’së ka kërkuar zgjedhje të reja sa më shpejt.
“Nuk ka më legjitimitet dhe as vullnet politik për të vazhduar me këtë strukturë të Kuvendit. Zgjedhje sa më parë, për zgjidhje më të mirë, për demokraci funksionale!”, ka deklaruar ajo.
Postimi i plotë:
Situata e sotme në Kuvendin e Kosovës nuk ishte asgjë e re, përveç përsëritjes së qëllimit të opozitës së deritashme: mbajtja e bllokadës në Kuvendin e Kosovës.
Asnjë nga deklaratat e tyre publike nuk u respektua:
- LDK që në fillim të prillit, deklaroi se nuk do ta bllokojë konstituimin e Kuvendit, por po bën të kundërtën.
- PDK deklaroi se do të votojë këdo nga deputetët e zgjedhur që nuk ka qenë pjesë e kabinetit qeveritar, por sot dëshmoi të kundërtën.
- Lista Serbe, që nga fillimi, ka mbajtur të njëjtin qëndrim me dy të parat.
E ndërkohë, prapë përmendet Gjykata Kushtetuese për zgjidhje pas 30 ditëshit.
Gjykata, Prokuroria – këto janë kryefjala e secilës deklaratë të eksponentëve të opozitës. Ajo që nuk u fitua përmes procesit të vetëm legjitim të demokracisë – zgjedhjeve – po tentohet të fitohet në sallat e gjykatës dhe me vendimet e Prokurorisë, sidomos asaj speciale.
Prandaj, është urgjente gjetja e zgjidhjes për të shpallur zgjedhje të jashtëzakonshme nacionale. Demokracia buron nga vullneti i sovranit. E kur ky vullnet nuk respektohet, ai duhet të rikonfirmohet.
Nuk ka më legjitimitet dhe as vullnet politik për të vazhduar me këtë strukturë të Kuvendit. Zgjedhje sa më parë, për zgjidhje më të mirë, për demokraci funksionale!
