Miliona kinezë u përballën me radhë të mëdha në rrugë disa ditë më parë, të hënën më 6 tetor ndërsa ktheheshin në shtëpi pas përfundimit të festave tetë-ditore të Ditës Kombëtare dhe Festës së Hënës .
Stacioni më i madh i pagesës në vend, në provincën Anhui, u “përmbyt” me automjete, me pamjet që u bënë virale në mediat sociale.
Videot e publikuara tregojnë stacionin e pagesës me 36 korsi në Wuzhou që shkëlqen natën nga dritat e kuqe të pasme të makinave të panumërta që prisnin të kalonin. Sipas autoriteteve, vetëm në ditën e fundit të festës, më shumë se 120,000 automjete kaluan nëpër këtë pikë.
Pamjet e dronit kapën dhjetëra makina që lëviznin në korsi të shumëfishta për të arritur në sportelet e pagesës, duke formuar përfundimisht një radhë me katër korsi.
Festivali i Mesvjeshtës, një nga festat më të rëndësishme të bashkimit familjar në Kinë, përkoi me festën e Ditës Kombëtare të këtij viti, duke e zgjatur festën nga 1 tetori deri më 8 tetor.
Sipas Ministrisë së Kulturës dhe Turizmit, gjatë festës së këtij viti u kryen rreth 888 milionë udhëtime, krahasuar me 765 milionë vitin e kaluar, kur festa zgjati shtatë ditë.
Bllokimi i madh i trafikut në stacionin e pagesës Wuzhuang u kujtoi shumë shoferëve trafikun jashtëzakonisht të lartë gjatë periudhës së Vitit të Ri Kinez.
Kjo nuk është hera e parë që incidente të tilla janë regjistruar në Kinë. Më i famshmi ndodhi në vitin 2010, kur një bllokim trafiku 12-ditor paralizoi autostradën Pekin-Tibet.
Më 14 gusht 2010, një seri prishjesh kamionësh shkaktuan një bllokim trafiku prej më shumë se 100 kilometrash, me mijëra shoferë dhe pasagjerë të bllokuar për gati dy javë.
