Instituti Kombëtar i Shëndetësisë Publike të Kosovës (IKShPK) ka ndarë disa këshilla të rëndësishme për pushuesit që kanë zgjedhur bregdetin për të kaluar ditët e nxehta të verës.
Sipas IKShPK-së, pushimet janë të rëndësishme për mirëqenien fizike dhe mendore të secilit individ, prandaj sugjerohet që ato të shfrytëzohen në mënyrë të sigurt dhe të kujdesshme.
“Pushimet në det janë një mundësi e mirë për t’u relaksuar dhe për të kaluar kohë cilësore me familjen dhe miqtë. Pavarësisht moshës apo aftësive fizike, çdo pushues duhet të ketë mundësi të shijojë këtë kohë pa shqetësime për rreziqet e mundshme”, thuhet në njoftim.
IKShPK këshillon:
Përdorni krem mbrojtës nga dielli për të mbrojtur lëkurën nga rrezet e dëmshme UV
Pini sa më shumë ujë, që të qëndroni të hidratuar
Mbani syze dielli, për mbrojtje të syve
Shmangni notin vetëm, gjithmonë notoni me dikë tjetër ose nën mbikëqyrje
Kontrolloni kushtet e detit, dhe respektoni sinjalizimet e plazhit
Mos harroni kapelën, për mbrojtje të kokës dhe fytyrës nga rrezet e diellit
Instituti thekson se ndjekja e këtyre këshillave ndihmon në shmangien e rreziqeve dhe garanton një përvojë pushimi më të këndshme dhe të sigurt për të gjithë.
