Deputeti i Partisë Demokratike të Kosovës, Enver Hoxhaj, ka reaguar pas vendimit të presidentes, Vjosa Osmani për shpërndarjen e Kuvendit.
Përmes një postimi në rrjetet sociale, ai ka deklaruar se vendi po hyn në një periudhë vendimtare për të ardhmen e demokracisë.
Sipas Hoxhajt, për vite me radhë institucionet demokratike janë dobësuar dhe shteti është përballur me procese që, sipas tij, kanë çuar drejt autoritarizmit.
Ai ka akuzuar koalicionin e vitit 2021 të udhëhequr nga kryeministri Albin Kurti dhe presidentja Vjosa Osmani, duke thënë se veprimet dhe vendimet e tyre politike kanë synuar “çmontimin e demokracisë dhe vendosjen e autoritarizmit” në vend.
Hoxhaj ka pretenduar gjithashtu se dështimi për zgjedhjen e presidentit nuk ishte rastësor, por i planifikuar.
“Dështimi i zgjedhjes së Presidentit ishte i planifikuar dhe i qëllimshëm, duke e lënë vendin që nga 5 marsi pa President dhe që nga 9 shkurti 2025 pa një Kuvend funksional”, ka shkruar ai.
