Ish-deputeti i PDK-së i akuzon Abdixhikun, Kurtin e Osmanin për gjuhë fyese ndaj luftës dhe për zhbërje të shtetit të Kosovës.
Ish-deputeti i PDK-së, Hisen Berisha, ka reaguar me tone të ashpra ndaj kryetarit të LDK-së, Lumir Abdixhiku, kryeministrit Albin Kurti dhe presidentes Vjosa Osmani, duke i akuzuar se përbëjnë të njëjtën strukturë ideologjike “sorosiane” me qëllim, sipas tij, stërkeqjen e shtetit të Kosovës.
Në një reagim të gjatë publik, Berisha tha se Abdixhiku ka “kaluar vijën” me deklaratat e tij të fundit, duke përdorur një gjuhë që, sipas tij, fyen luftën dhe sakrificën e luftëtarëve të UÇK-së. Ai theksoi se përdorimi i termit “mercenar” ndaj luftëtarëve nuk është lapsus, por zgjedhje e qëllimshme politike.
“Ju, Lumir Abdixhiku, bashkë me Vjosa Osmanin dhe Albin Kurtin, përbëni të njëjtën strukturë ideologjike sorosiane, që synon zhbërjen e shtetit të Kosovës dhe rikthimin e nostalgjisë jugosllave”, shkruan Berisha.
Ai kritikoi edhe heshtjen brenda LDK-së, duke e cilësuar atë si rreshtim politik me kundërshtarët e luftës dhe pavarësisë. Sipas tij, partia që dikur mishëronte vizionin rugovian për shtetin e Kosovës, sot është larguar nga parimet themelore të saj.
Berisha akuzoi gjithashtu krerët politikë për sulme ndaj figurave shtetformuese, si Hashim Thaçi dhe drejtues të UÇK-së, duke e quajtur këtë veprim dëshmi besnikërie ndaj “padronëve ideologjikë”.
Në fund, ai theksoi se luftëtarët e UÇK-së nuk janë “mercenarë”, por themeli mbi të cilin qëndron shteti i Kosovës, duke paralajmëruar se Kosova ende ka njerëz të gatshëm të mbrojnë vlerat e saj themelore.
