Ministrja në detyrë e Drejtësisë, Albulena Haxhiu, në konferencën e sotme ka shprehur shqetësim të madh për vendimin e Gjykatës Kushtetuese, duke e cilësuar si një tejkalim flagrant të kompetencave të saj.
“Për mua njoftimi i Gjykatës Kushtetuese përbën shqetësim serioz sepse është tejkalim flagrant i kompetencave që ka Gjykata Kushtetuese,” tha ajo.
Haxhiu theksoi se sipas nenit 4 të Kushtetutës, Gjykata Kushtetuese është institucioni më i lartë që bën interpretimin e Kushtetutës dhe garanton respektimin e saj. Megjithatë, disa nga pikat e dispozitivit të publikuar nuk burojnë nga teksti i Kushtetutës dhe nuk janë parashikuar në asnjë nen apo dispozitë, duke krijuar norma të reja që janë funksion i pushtetit legjislativ.
Ajo shtoi se Kushtetuesja i ka “grabitur” kompetencat Kuvendit kur vendosi që votimi të bëhet në mënyrë të hapur.
“Ku e ka pa Gjykata Kushtetuese këtë?” tha Haxhiu, duke iu referuar urdhrit të gjykatës që i njëjti kandidat mund të realizohet vetëm deri në 3 herë.
“Gjykata ka krijuar një normë të re sepse kjo nuk ekziston askund, as në Kushtetutë e as në rregullore të Kuvendit,” përfundoi ajo.
