Kryetari i Komunës së Mitrovicës, Bedri Hamza, ka zhvilluar një takim me ambasadorin e Mbretërisë së Bashkuar në Kosovë, Jonathan Hargreaves, ku u diskutua për zhvillimet politike dhe sfidat institucionale në vend.
Përmes një postimi në Facebook, Hamza bëri të ditur se fokus i bisedës ishte nevoja për formimin e institucioneve të reja në nivelin qendror, duke theksuar rëndësinë e stabilitetit politik për të ardhmen e vendit.
“Sot e prita ambasadorin britanik Jonathan Hargreaves, me të cilën bisedova për nevojën e krijimit të institucioneve të reja në nivelin qendror dhe për zhvillimet politike në vendin tonë. Britania e Madhe është partnere strategjike e Kosovës dhe i jemi shumë mirënjohës për mbështetjen e vazhdueshme të saj” – ka shkruar ai.
