Kompania gjermane e industrisë së mbrojtjes, Rheinmetall AG, ka hapur zyrtarisht fabrikën më të madhe për prodhimin e municioneve në kontinentin europian. E vendosur në qytetin Unterlüß, objekti do të fokusohet fillimisht në prodhimin e predhave të artilerisë kalibër 155 mm, i cili është një standard i forcave të NATO-s.
Në ceremoninë e përurimit ishte i pranishëm edhe Sekretari i Përgjithshëm i NATO-s, Mark Rutte, i cili nënvizoi rëndësinë strategjike të këtij investimi për sigurinë evropiane, sidomos në kontekstin e tensioneve në rritje në lindje të kontinentit.
Sipas deklaratës zyrtare të Rheinmetall, kapaciteti i plotë i prodhimit pritet të arrihet deri në vitin 2027, me një potencial prej deri në 350 mijë predha artilerie në vit. Për më tepër, duke nisur nga viti 2026, fabrika do të zgjerojë aktivitetin me prodhimin e armëve raketore, çka do të forcojë ndjeshëm kapacitetet teknologjike dhe operacionale të kompanisë.
Në vijim të këtij zgjerimi, Rheinmetall ka njoftuar edhe planin për ndërtimin e një fabrike të re në Ukrainë, me synimin për të krijuar një rrjet të integruar mbrojtjeje në nivel evropian. Kjo nismë synon të thellojë bashkëpunimin mes vendeve anëtare të NATO-s dhe partnerëve rajonalë.
Ndërkohë, sipas një sondazhi të publikuar nga instituti gjerman Forsa, 52 për qind e qytetarëve të Gjermanisë shprehen se Ukraina duhet të marrë në konsideratë bërjen e lëshimeve territoriale në funksion të një marrëveshjeje paqeje me Rusinë. Kjo shifër reflekton polarizimin në rritje brenda opinionit publik evropian për sa i përket mënyrës së zgjidhjes së konfliktit në Ukrainë.
